Pastoor se vonnis sloer steeds

OUDTSHOORN NUUS - Vonnisverrigtinge in die saak teen Stephanus Olivier, die pastoor wat skuldig bevind is op drie aanklagte van verkragting, vier van seksuele aanranding en 24 vir die besit van kinderpornografie, moes Dinsdag nog ‘n keer uitgestel word toe sy regsverteenwoordiger om mediese redes nie beskikbaar was nie.

Werner Swanepoel, 'n kollega van Olivier se regsverteenwoordiger, Christo van der Bergh, het ‘n mediese sertifikaat aan die hof oorhandig en die hof versoek om die saak ‘n laaste keer uit te stel.

Streeklanddros Daniel Boks het die versoek toegestaan en die saak finaal en as voorkeursaak tot 2 November uitgestel.

Volgens die landdros sloer die saak nou te lank om afgehandel te word en voorgestel dat iemand anders vir Van der Bergh instaan indien hy weer nie beskikbaar is nie. Die verkragting van die twee klaers het in 2003 plaasgevind toe hulle onderskeidelik 13 en 14 jaar oud was.

Adv. Michelle Weyers is die aanklaer in die saak en Olivier se borgtog van R10 000 is tot sy volgende verskyning verleng.

Vorige artikels: