Weermagmoord: Geen borg vir Titus

Update

OUDTSHOORN NUUS - Magdaleen Titus, wat vanmiddag skuldig bevind is van die moord op haar man, Preston Titus, sal Kersfees in die tronk wees.

Henk Carstens, Titus se regsverteenwoordiger, het vanmiddag 'n nuwe borgtogaansoek aan die hof gebring.

Titus het self getuig in die saak om buitengewone omstandighede te bewys vir waarom sy borgtog moet kry. Volgens haar is daar buitengewone omstandighede vir borgtog wat weer aan haar toegestaan kan word. Sy het aangevoer dat sy die R30 000 wat sy aanvanklik betaal het vir borgtog nodig het vir haar kinders, dat sy nie 'n vlugrisiko is nie en dat sy graag haar twee dogters op die vonnisoplegging wil voorberei.

Sy het ook gesê dat haar ma ernstig siek is en dat haar eie gesondheid ook nie goed is nie.

Adv. Christènis van der Vijver het egter gesê dat sy (Titus) nie op die stadium haar kinders se belange as buitengewone omstandighede kan gebruik nie omdat sy nie hulle belange in ag geneem het toe sy hul pa om die lewe gebring het nie.

Volgens Van der Vijver, is Titus wel 'n vlugrisiko omdat sy 'n baie lang vonnis in die gesig staar.

Hy het dit ook aan haar gestel dat korrektiewe dienste se mediese behandeling goed is en dat hulle in die tronk ook aan haar mediese behoeftes kan voorsien.