Update
OUDTSHOORN NUUS - Nege maande na Tammy Weyers en Fritz Jacobs in Knysna vir diefstal in hegtenis geneem is, is hulle vandag in die Oudtshoorn-streekhof gevonnis.
Jacobs, ‘n voormalige werknemer van Badenhorst Slaghuis op Oudtshoorn, en sy vriendin, het in September verlede jaar met R405 249,74 van die werk se geld en die bakkie van die besigheid verdwyn.
Hulle is die volgende dag in hegtenis geneem.
Jacobs het tereg gestaan op twee klagtes. Een van die gebruik van ‘n voertuig sonder die eienaar se toestemming en een van diefstal. Hy het skuldig op beide klagtes teen hom gepleit.
Weyers het slegs op ‘n klag van diefstal tereg gestaan. Sy het skuldig op dié klag teen haar gepleit.
Jacobs is tot vyf jaar gevangenisstraf gevonnis. Landdros Daniël Boks het ook ‘n bykomende vyf jaar tronkstraf, wat vir vyf jaar opgeskort is, by die vonnis gevoeg.
Weyers het drie jaar tronkstraf gekry wat vir vyf jaar opgeskort is. Sy is vir die duur van haar vonnis onder 24 uur huisarres geplaas, behalwe as sy moet werk toe gaan of kerk toe gaan. Sy moet 18 maande gemeenskapsdiens doen en ook by ‘n rehabilitasieprogram aansluit.
Sy mag nie alkohol of verdowingsmiddels gebruik, behalwe as dit deur ‘n dokter voorgeskryf word nie. Sy mag haarself nie skuldig maak aan enige misdrywe nie en mag nie die dorp verlaat sonder dat sy die korrektiewe toesigbeampte daarvan in kennis stel nie.
Lees die volledige berig in Vrydag se Oudtshoorn Courant, asook aanlyn.
Lees vorige artikels hier:
- Slaghuis-diefstelsaak word weer uitgestel
- Diefstalsaak vir nuwe pleitooreekoms uitgestel
- Diefstalsaak sloer steeds
- Beweerde diewe hoor eersdaags hul lot
- Saak vir moontlike pleit uitgestel
- Beweerde diewe in streekhof
- Streekhofdatum vir beweerde diewe
- Slaghuissaak uitgestel vir streekhofbeslissing
- Ma pleit dat seun nie borg kry nie
- Opvolg: Ma pleit vir seun
- Ma vra dat seun aangehou word
- Landdros sê môre oor borg
- Borgtogaansoek uitgestel
- Paartjie verskyn in die hof
- Paartjie in Knysna vasgetrek
- Fritz Jacobs gevang
- Nog geen nuus oor twee vermistes
'Ons bring jou die nuutste Oudtshoorn, Klein Karoo nuus'
