Titus-moordverhoor weer uitgestel

Update

OUDTSHOORN NUUS - Die moordverhoor van Preston Titus, wat Maandag in die rondgaande hooggeregshof op Oudtshoorn moes voortgaan, is Woensdag tot 27 Mei uitgestel.

Die saak is Maandag na Woensdag uitgestel omdat Masithembe January (MJ), een van die beskuldigdes, glo vervoerprobleme gehad het en Magdaleen Titus, Preston se vrou en ook 'n beskuldigde in die saak, se regsverteenwoordiger adv. Mustaque Holland, ook nie beskikbaar was nie.

Die hof het Woensdag gehoor dat Titus vir regshulp aansoek gedoen het, maar nie geslaag het nie. Holland wag eers op finansiële instruksies van Titus voordat hy besluit of hy as haar regsverteenwoordiger sal aanbly. Hy het gesê daar is geld uitstaande en hy behoort teen Vrydag 24 Mei te weet of hy haar verder gaan verteenwoordig.

Regter Nolwazi Boqwana het haar misnoeë hiermee te kenne gegee en gesê beskuldigdes moet vooraf seker maak dat hul finansies agtermekaar is omdat uitstelle soos in hierdie geval, die saak onnodig uitrek.

Die verhoor het in Maart midde 'n verhoor binne 'n verhoor gestop en sou vandag voortgegaan het.

Justice Mooi, 'n derde beskuldigde in die saak, se prokureur, adv. Stoffel Prinsloo, betwis die bekentenis wat Mooi na bewering by die polisie afgelê het omdat die verklaring glo onder dwang afgelê is en dat Mooi hardhandig deur die polisie behandel is.

Verskeie polisiebeamptes het in Maart getuig.

Ao. Martin le Roux, 'n ondersoekbeampte in die saak, was die laaste getuie wat vandag met sy getuienis oor Mooi se arrestasie in Port Elizabeth moes voortgaan.

Mooi bly in aanhouding en Titus en Natasha Stuurman, die vierde verdagte in die moord, se borgtog is verleng.

Magdaleen Titus (links) en haar regsverteenwoordiger adv. Mustaque Holland (heel regs). Foto: Liezl van Niekerk