Borgtog aan man geweier

OUDTSHOORN NUUS - Borgtog is in die Oudtshoorn-landdroshof geweier aan 'n man van De Rust, Dawid Stuurman (23), wat teregstaan op aanklag van roof met verswarende omstandighede.

Stuurman het glo op 4 Desember verlede jaar sy neef, Henry Stuurman (27), van Oudemuragie, met 'n mes gesteek en van 'n kan wyn beroof.

Hy het aangedui dat hy onskuldig sal pleit.

Die ondersoekbeampte het borgtog teengestaan omdat Stuurman 'n vlugrisiko is en moontlik nie hofverrigtinge sal bywoon nie.

Hy sal waarskynlik ook nie enige borgtogvoorwaardes nakom nie en daar is nog talle hangende sake teen hom.

Hy is ook moeilik te vinde wanneer die polisie hom soek.

Stuurman se regshulpprokureur, Wynand Malan, het egter vir borgtog gevra omdat geen getuienis voor die hof gebring is dat hy met getuies sal inmeng, sal vlug of weer 'n misdaad pleeg nie.

Volgens die staatsaanklaer, Leonie van Rooyen, moet Stuurman in werklikheid van poging tot moord aangekla word.

Sy het ook borgtog teengestaan omdat Stuurman nie 'n eerste oortreder is nie, en dit in gemeenskapsbelang is dat hy in aanhouding bly.

Landdros Roelf Konstabel het borgtog geweier omdat Stuurman 'n geneigdheid toon om oneerlikheidsmisdrywe te pleeg.

Daar bestaan ook geen buitengewone omstandighede om borgtog toe te staan nie.

Die saak is vir verdere ondersoek tot 27 Februarie uitgestel.

Lees vorige artikels: