OUDTSHOORN NUUS - Laerskool Laurus se krieketspelers het die afgelope week goeie resultate gelewer.
Die skool het teen Saturnus Primêr en Van Reede Skool gespeel.Joshua January skitter met 133 lopies vir Laurus se o. 13A-span
Laerskool Laurus se o. 13A-krieketspan het ’n indrukwekkende vertoning teen Van Reede se o. 13A-span gelewer.
Laurus het eerste gekolf en ’n kragtige totaal van 220/5 in hul toegelate 20 beurte aangeteken.
Joshua January was die ster van die beurt met ’n uitstekende 133 lopies van slegs 50 balle. Nickyle Augustus het ook met 34 lopies ’n waardevolle bydrae gelewer.
Van Reede het daarna 71/5 in hul 20 beurte aangeteken. Kealan Williams het met die bal uitgeblink deur twee paaltjies te neem.
Laurus se kolwers het die grondslag vir ’n indrukwekkende telling gelê, terwyl die boulers hul deel gedoen het om druk op die teenstanders te plaas.
Laurus se o. 13B-krieketspan klop Saturnus met 52 lopies
Die o. 13B-krieketspan het ’n uitstekende oorwinning behaal toe hulle Saturnus se o. 13A-span met 52 lopies geklop het.
Laurus het eerste gekolf en 121/9 in hul toegelate 20 beurte aangeteken. Raydin Isaacs het met 27 lopies die telling aangehelp, gevolg deur JJ Kriel met 24 lopies en Dimitri Oktober met 17 lopies.
Laurus se boulers het daarna die druk op Saturnus toegepas en die span vir slegs 69 lopies uitgeboul. Hadrial Pietersen was besonder suksesvol met die bal en het drie paaltjies geneem, terwyl Zion Strydom twee paaltjies platgetrek het.
Laurus het die wedstryd met ’n oortuigende voorsprong van 52 lopies gewen.
Laurus se o. 11B’s boul Saturnus vir net 67 lopies uit
Die o. 11B-krieketspan het uitstekend gevaar teen Saturnus se o. 11A-span.
Laurus het eerste gekolf en ’n stewige totaal van 123/6 aangeteken. John-Ross Arries het met ’n puik beurt van 50 lopies die voortou geneem, terwyl Christiano Waldeck ’n waardevolle bydrae van 24 lopies gelewer het.
Saturnus kon daarna slegs 67 lopies aanteken. Granwill Piedt, Cruzwill Williams en Zubinathi Nombande het elk twee paaltjies platgetrek en ’n belangrike rol in Laurus se boulvertoning gespeel.
Laurus se o. 13-meisies lewer goeie vertoning teen Van Reede
Laerskool Laurus se o. 13-meisies het ’n goeie vertoning in hul krieketwedstryd teen Van Reede gelewer.
Van Reede het eerste gekolf en 118 lopies aangeteken. Zeah Vallentyn het twee paaltjies geneem, terwyl Crushay Stefaas een paaltjie platgetrek het.
Laurus het daarna hard probeer om die teiken te haal en 98/8 aangeteken.
Hoewel die span ongelukkig die wedstryd verloor het, het die meisies goeie gees en deursettingsvermoë getoon.
‘Ons bring jou die nuutste Tuinroete, Hessequa, Karoo nuus’
