OUDTSHOORN NUUS - Marnus Botha, wat Suid-Afrika verlede week by die Mister Global-kompetisie in Thailand verteenwoordig het, is terug in die land. Hoewel hy nie onder die top 20 geëindig het nie, beskou hy die ervaring as 'n besondere voorreg.
Botha het sy dank uitgespreek teenoor sy familie, vriende, ondersteuners en borge wat hom gedurende die reis bygestaan het.
"Een van die grootste hoogtepunte was toe vreemdelinge my tydens die kompetisie genader het om te vertel hoe my reis hulle geïnspireer het, as 'n pa wat sy drome nastreef sonder om die belangrikheid van sy gesin uit die oog te verloor."
Dit was egter moeilik om van sy kinders af weg te wees. Hy moes selfs sy seun se verjaardag mis omdat hy in Thailand was.
"Ek het na Thailand gekom om Suid-Afrika by Mister Global te verteenwoordig. Ek vertrek met herinneringe, vriendskappe, lesse en 'n hart voller as wat ek ooit kon dink," het Botha gesê.
Vir hom lê die ware oorwinning nie net in 'n titel of trofee nie, maar ook in die geleentheid om ander te inspireer.
Hy hoop sy kinders sal eendag verstaan dat hy sy drome nagejaag het om hulle te wys dat 'n mens na groot dinge kan streef sonder om te vergeet waar jou hart hoort.
"Die belangrikste titel wat ek ooit sal dra, is nie een wat deur 'n skoonheidskompetisie aan my gegee is nie, maar die een wat aan my by die huis gegee is: Pa."
Lees ook:
‘Ons bring jou die nuutste Tuinroete, Hessequa, Karoo nuus’
