OUDTSHOORN NUUS - Drie lede van Metro-nooddiens in Oudtshoorn het verlede maand verligting en vreugde na skole gebring sonder die gewone loei van sirenes en flitsende ligte.
Marcelleno Gordon, Nicolas Schoeman en Winston Jonathan het op 20 Augustus twee skole buite Oudtshoorn besoek en pakke klere en beddegoed aan die kinders geskenk. Volgens Gordon het hulle Vrederust-kleuterskool en Roodewal UCC Primêr besoek as deel van 'n projek wat Metro begin het.
"Ek het die twee skole verlede jaar besoek en die nood besef. Ek het besef dat ek kan terugploeg in ons landelike skole. My plan was eers net die crèche, maar toe die klere begin inkom het ek besluit op die laerskool en Schoemanshoek-gemeenskap ook," sê Gordon.
Hy is baie opgewonde oor die hoeveelheid skenkings wat hulle ontvang het en sê dat nie net klere nie, maar ook beddegoed geskenk is. Die span wil egter nie hier stop nie sê Gordon, en hulle het reeds met die Oudtshoorn forensiese span hande gevat om die projek verder uit te brei.
"Ons vra die publiek om aan ons projek deel te neem deur klere, beddegoed en enige ander lewensmiddele te skenk," nooi hy. Die Metro-span is ook op soek na verf in helder kleure wat hulle wil gebruik om die speelpark by Vrederust op te kikker.
Vir enige navrae of om hulp aan te bied skakel gerus vir Marcelleno Gordon by 076 183 6846.
Die leerders en onderwysers van Roodewal UCC Primêr by lede van Metro-nooddiens. Foto's verskaf.
Marcelleno Gordon (links), Winston Jonathan en Nicolas Schoeman (heel regs) by personeel en leuters van Vrederust-kleuterskool.
ARTIKEL EN FOTO'S: HANNES VISSER, OUDTSHOORN COURANT - REDAKTEUR
'Ons bring jou die nuutste Oudtshoorn, Klein-Karoo nuus'
