Verkeersbeamptes ontvang lof ná arrestasie van moordverdagte

OUDTSHOORN NUUS - Twee provinsiale verkeersbeamptes, Paul Stassen en Jean-Pierre Viviers, is met groot lof bekroon nadat hulle 'n moordverdagte tydens 'n padblokkade in hegtenis geneem het.

Die 60-jarige Abraham Herandien van Bloupunt, Dysselsdorp, is Dinsdag 21 Maart 2023, deur Francisco Erasmus (50) vermoor.

Erasmus is tydens 'n padblokkade tussen Oudtshoorn en De Rust afgetrek. Herandien is met veelvuldige steekwonde deur dié verkeersbeamptes in die motor van Erasmus gevind en Erasmus is in hegtenis geneem.

Oudtshoorn-burgemeester, Johan Allers, het op Dinsdag 24 Junie 'n spesiale brief van gelukwensing en dank aan die beamptes oorhandig. Tydens die oorhandiging het hy sy opregte waardering uitgespreek vir hul uitsonderlike waaksaamheid en toegewyde diens aan Oudtshoorn en die streek.

"Dit is met groot waardering dat ek kennis geneem het van u bepalende rol in die arrestasie van 'n vermeende moordenaar. U skerpsinnigheid, professionaliteit en vinnige optrede het nie net tot 'n belangrike arrestasie gelei nie, maar ook weereens bewys dat ons inwoners op die geregtigheidstelsel en sy amptenare kan staatmaak," het Allers gesê.

Hy het verder beklemtoon dat hul optrede 'n inspirasie is in 'n tyd waarin gemeenskappe dikwels moedeloos voel oor toenemende geweldsmisdade.

"U voorbeeld van diens en geregtigheid bring hoop en vertroue. U verteenwoordig alles waarvoor 'n openbare dienswerker behoort te staan - integriteit, verantwoordelikheid en 'n opregte verbintenis tot die veiligheid van ander."

Allers het afgesluit deur hulle geluk te wens en te bedank vir hul onwrikbare diens aan die gemeenskap:

"U is 'n voorbeeld van professionele uitnemendheid, en ek is trots om u as deel van die breër veiligheidsnetwerk van die Groter Oudtshoorn te hê. Mag u optrede voortgaan om ander aan te moedig, en mag u geseënd wees in u verdere diens aan ons provinsie en sy mense.

Vorige artikels:

‘Ons bring jou die nuutste Tuinroete, Hessequa, Karoo nuus’