Verken pragtige bergpasse 

Van Calitzdorp tot Ladismith ontvou berge, passe en poorte, elke kronkelpad wys die Klein-Karoo se stilte, skoonheid en ontdekkingsvreugde.

As jy van bergpasse hou is die eerste een sommer knap anderkant Calitzdorp waar die R62 met die Huisrivierpas oor die berg kronkel en pragtige bergtonele bied. Die pas het 39 draaie waarvan enkeles baie skerp is. Die natuurskoon is iets besonders en daar is genoeg aftrekplek.

Seweweekspoort se afdraai is sowat 15 km voor Ladismith net voor Zoar. Dit is ’n goeie grondpad wat soos Meiringspoort deur ’n kloof in die berge kronkel. Die poort is ongeveer 17 km lank, maar druk deur Laingsburg toe vir middagete en draai daar om. As jy nie tot in Laingsburg wil ry nie bied die pad deur Seweweekspoort nog ’n pas.

Die Bosluiskloofpas van ongeveer 24 km wat tussen Seweweekspoort en Laingsburg afdraai. Dié uitsonderlike pas kronkel tussen die Swartberge en Elandsberge en eindig by die Gamkapoortdam. Bevestig die toestand van die pad voordat jy dit in jou gewone sedanmotor aanpak.

Op pad terug van Seweweekspoort af wees op die uitkyk vir die Hoeko-pad wat verby Zoar van die R62 afdraai en volg ’n pragtige alternatiewe roete tussen plase deur tot in  Ladismith.

Vir ’n interessante roete kus toe ry sowat 13 km op die R62 in die rigting van Barrydale en neem dan die grondpad via Van Wyksdorp en Herbertsdale tot in Mosselbaai. Jy het tyd hiervoor nodig, nie omdat die pad sleg is nie, maar omdat daar soveel te sien is.

As jy teerpad verkies, hou verby die afdraai na Van Wyksdorp en ’n katspoeg verder draai jy links Riversdal toe oor die pragtige 12 km Garciapas wat die Langeberge oorsteek. Die oorspronklike pas is deur Thomas Bain ontwerp en 107 gevangenes het in 1873 aan die pas begin bou. Dit is in 1877 voltooi