OUDTSHOORN NUUS - Oudtshoorn se eie parafietsryer, Vussi Marenene, oefen tans hard ter voorbereiding vir ’n besige en uitdagende seisoen.
Sy program sluit deelname aan die 1 000 km Bidii Yetu 2026-wedren deur Botswana, van Gaborone tot Kasane, die Isuzu Ironman in Mosselbaai en die SA parafietsrykampioenskappe in.
Volgens Vussi oefen hy daagliks tot twee maal per dag om toe te sien dat sy fiksheid op peil bly.
“Fiksheid is altyd belangrik vir die tipe uitdagings wat ek aanpak.”
Ten spyte daarvan dat Marenene ’n kwadrupleeg is en slegs twee jaar ervaring op ’n handfiets het, lewer hy reeds uitsonderlike prestasies.
Hy het tydens sy eerste deelname aan die Outeniqua-rolstoelwedren (OCC) ’n eerste plek behaal en oefen en kompeteer tans op ’n geleende driewielfiets wat sowat 7 kg swaarder is as die liggewig koolstofveselfietse wat deur baie van die land se voorste parafietsryers gebruik word.
Oor ’n afstand van 40 km is hy reeds binne 5 km/h van die tempo van atlete wat op wêreldkampioenskapvlak meeding, en baie reeds jare langer in die sport betrokke is.
Met sy oog stewig gevestig op kwalifisering vir die Paralimpiese Spele van 2028, het Marenene die potensiaal om Oudtshoorn opnuut op die kaart te plaas as ’n sentrum van fietsry-uitnemendheid.
Om sy droom te verwesenlik, benodig hy egter dringend nuwe wiele, bande en verbeterde oefentoerusting.
Aangesien die grootte van sy huidige bande moeilik in Suid-Afrika verkrygbaar is, help Cycle Addict in Oudtshoorn tans met die bou van nuwe wiele wat van meer beskikbare komponente gebruik maak. Die publiek word uitgenooi om Marenene se droom te ondersteun deur donasies wat sal help om die nodige toerusting te bekom op sy pad na moontlike paralimpiese sukses.
Vorige berigte:
- Bidii Yetu Vusis next challenge
- 6th place for Oudtshoorns Vusi at OCC
- Marenene mik vir Paralimpiese Spele
‘Ons bring jou die nuutste Tuinroete, Hessequa, Karoo nuus’
