Lions brul in die leeukuil

OUDTSHOORN KRIEKTNUUS -Die Lions-vlakkiekrieketspan het verlede Sondag in 'Die Leeukuil' (veld agter die Toekomsrus-kliniek) gewys waarom hy as een van die groot aanspraakmakers in vanjaar se OPL-liga beskou moet word toe hy die Samewerking-span in 'n kwarteindwedstryd met 52 lopies afgeransel het.

Die Lions het die loot gewen, eerste gekolf en 'n uitdagende 124 lopies op die telbord geplaas.

Levanio Nathan (24) en Cameron Rhoode (18) het tafel gedek vir Tyrese Karelse wat 'n briljante 60 lopies gemoker het om sy span van broodnodige momentum te voorsien. Karelse, wat ook 'n SWD-speler en 'n voormalige lid van die o.19 Protea-span is, se beurt het vyf viere en drie sesse ingesluit.

Samewerking se lopiejaagtog het redelik goed begin met hul aanvangskolwer, Dylan Nuys, wat 32 lopies kon vermag. Na sy vertrek was dit slegs Adrian Booysen (15) wat enige noemenswaardige bydrae kon maak en is dié span uiteindelik in die 19de boulbeurt vir 72 almal uitgehaal.

Die onoorwonne Neppon Warriors het in sy wedstryd teen die Champs in sy toegelate 20 boulbeurte 141 vir die verlies van nege paaltjies behaal. Kurtley Coerecius (60) en Willem Goliath (40) was die span se beste kolwers.

Die Champs daarenteen het van meet af aan uit sy diepte gelyk en vir 'n 66 lopies uitgeknikker. Zandrè Wyngaard was die Warriors se beste bouler met vier paaltjies vir 17 lopies van sy drie boulbeurte.

In die ander kwarteindstryde het die Old Crocs die Dreamteam ore aangesit, terwyl die Firestones sy ou vyand, Die Legends, met die kous oor die kop huis toe gestuur het.