OUDTSHOORN NUUS - Die familie van die seun wat Sondagoggend na 'n fratsongeluk by die KKNK oorlede is vra dat hulle tyd gegun word om hulle seun te begrawe.
"Ons is nog besig om die trauma van ons kleinkind se dood te verwerk," het die seun se oupa, Hamilton Paraoh, Dinsdag gesê. Josh Pharaoh (9) van die Paarl was Vrydagmiddag saam met familielede by die KKNK waar hulle die weermag se uitstalling besoek het.
Lede van die publiek is toegelaat om op sommige van die pantservoertuie te klim. Josh het op een van die voertuie geklim, maar moontlik sy balans verloor en kop eerste by 'n luik bo-op die voertuig ingeval. Hy het op die skerpkant van 'n ysterplaat binne die voertuig geval en ernstige hoofbeserings opgedoen.
Nadat hy aanvanklik na die Oudtshoorn Mediclinic geneem is, is hy per ambulans na die Life Bay View-hospitaal oorgeplaas. Hy is Sondagoggend in die hospitaal oorlede.
Hamilton Pharaoh het Dinsdag tydens 'n telefoongesprek gesê hulle wil nie bespiegel oor wat gebeur het nie aangesien 'n geregtelike ondersoek aan die gang is.
"Josh het vir die Paasnaweek saam met ons Oudtshoorn toe gekom om by familie te kuier en toe moes ons sonder hom teruggaan. Hy het nie verdien wat met hom gebeur het nie en ons wil nou ons aandag daarop vestig om my kleinseun met eerbetoon te begrawe."
Hy het bygevoeg dat hy namens die familie met die media sal praat as alles afgehandel is. "As ek enigiets kan wens sal dit wees dat geen ouers moet deurgaan wat Josh se ouers deurgaan nie, en daarom gaan ons nou tyd gee dat die ondersoeke afgehandel word sodat ons presies weet hoe die ongeluk plaasgevind het."
Teen spertyd het die weermag nie op 'n navraag geantwoord nie. Die polisie het bevestig dat 'n geregtelike doodsondersoek gedoen word en dat die oorsaak van dood deur 'n lykskouing bepaal sal word.
Rhodec Snyman, uitvoerende hoof van die KKNK het as volg op die tragiese voorval reageer en medelye met die naasbestaandes betoon:
“Die KKNK is bewus van die fratsongeluk op Vrydag, 14 April 2017 by die SANW se feesuitstalling, wat aanleiding gegee het tot Josh Pharaoh (9) se dood Sondagoggend in die Life Bay View Hospitaal op Mosselbaai. Ons harte gaan uit na Josh se hele familie, maar veral na sy ouers en grootouers. Ons wens hulle alle sterkte toe met die reëlings vir sy begrafnis en die baie moeilike tyd wat vir hulle voorlê.”
* Lise Meyer van die Paarl Post het met die ouers gesels en het die volgende inligting aan die Oudtshoorn Courant verskaf:
“Ons wil net afsluiting hê oor wat gebeur het en ons wil die waarheid weet,” het Nicole Cedres, Josh se ma vertel. Sy en haar man, Ryno, wou nie oor die omstandighede rondom die voorval praat nie aangesien die polisieondersoek nog aan die gang is. Josh was Nicole en Ryno, wat saam in Paarl-Oos woon, se enigste kind gewees.
Volgens Nicole was Josh ’n “sonskynkind” wat altyd gelag het en met enige persoon oor die weg kon kom. Sy sê, sy het ’n kind grootgemaak wat almal se kind was omdat hy diep in die harte van familie en vriende ingekruip het. Josh was 'n gr. 4-leerder van Laerskool Noord-Eind in die Paarl.
Weermaglede en lede van nooddienste in Oudtshoorn langs die pantservoertuig nadat die ernstig be-seerde Josh per ambulans hospitaal toe geneem is. Foto: Hannes Visser.
Klik hier vir vorige artikels:
- Boy (9) dies at KKNK: Mayor's condolences
- Seuntjie (9) sterf na fratsongeluk by KKNK
- Opvolg: Seun beseer by KKNK
ARTIKEL: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein Karoo nuus'
