OUDTSHOORN NUUS - Die Oudtshoorn-munisipaliteit het aangekondig dat begrafnisse by verskeie plaaslike begraafplase tydelik uitgestel word weens aanhoudende swaar reën en onveilige grondtoestande.
Volgens die munisipaliteit het die voortdurende reën gelei tot hoë waterpeile en versadigde grond by begraafplase in Oudtshoorn, Dysselsdorp en De Rust.
Hierdie toestande maak dit moeilik en gevaarlik om grafte vooraf veilig voor te berei en verhoog die risiko van grafinstortings.
Die publiek word daarom sterk aangeraai om alle begrafnisse wat vir Saterdag 9 Mei en Sondag 10 Mei geskeduleer is, uit te stel.
Die besluit raak die volgende begraafplase:
- Oudtshoorn-begraafplaas
- Dysselsdorp-begraafplaas
- De Rust-begraafplaas
Die munisipaliteit beklemtoon dat die veiligheid en welstand van families, begrafnisgangers en munisipale personeel die hoogste prioriteit bly.
Daar is verder gewaarsku dat enige besluit om voort te gaan met begrafnisse onder die huidige toestande geheel en al op eie risiko sal geskied.
Die munisipaliteit het om verskoning gevra vir enige ongerief en die gemeenskap bedank vir hul begrip en samewerking gedurende die uitdagende weersomstandighede.
‘Ons bring jou die nuutste Tuinroete, Hessequa, Karoo nuus’
