OUDTSHOORN NUUS - Boere in die Suid-Kaap word gemaan om seker te maak dat streng biosekuriteitsmaatreëls op hul plase in plek is om die verspreiding van bek- en klouseer (BEK) te voorkom.
Dit volg nadat een bevestigde geval van ’n BEK-uitbraak buite Mosselbaai aangemeld is, asook ’n moontlike geval buite George.
Hoewel die polisie en verkeersdepartemente reeds ’n ondersteunende rol speel in pogings om die BEK-uitbraak in die Wes- en Suid-Kaap te beperk, bly dit elke boer se verantwoordelikheid om hulle eie biosekuriteitsmaatreëls toe te pas en streng na te kom.
Die Suid-Afrikaanse polisiediens, tesame met provinsiale verkeersdienste en munisipale wetstoepassers, ondersteun veeartsenykundige owerhede deur kwarantynsones te monitor en beperkings op die beweging van vee af te dwing. Padblokkades en voertuiginspeksies word onder meer uitgevoer, veral gerig op vragmotors wat vee vervoer, om te verseker dat geldige bewegingspermitte en gesondheidsdokumentasie beskikbaar is.
Swaar voertuie wat diere vervoer, kan gestop en geïnspekteer word, terwyl amptenare nakoming verifieer om die onwettige of onbeheerde beweging van gesplete hoefdiere te voorkom.
Volgens Stefan Smith, voorsitter van die Klein-Karoo-landbouvereniging, rus die verantwoordelikheid vir bewegingsbeheer op plase by die boer self. Hy wys daarop dat die siekte maklik deur voertuie, sleepwaens, toerusting, fietsryers, klere, skoene, hande, voer en diereprodukte oorgedra kan word.
Wat behels biosekuriteitsmaatreëls op plase?
Boere is verantwoordelik om hul eie maatreëls in plek te hê en moet ook bewus wees van watter stelsels hul bure toepas.
Biosekuriteitsmaatreëls kan onder meer die volgende insluit:
- Geslote hekke en beheerde toegangspunte
- Duidelike “Geen ongemagtigde toegang”-kennisgewings
- ’n Besoekerslogboek
- Beperkte toegang tot dierekampe en krale
Besoekers kan verder verplig word om:
- Plaasverskafte stewels en oorpakke te dra
- Ontsmettende voetbaddens te gebruik
- Hande te was of te ontsmet voor en ná kontak met diere
Nuwe vee behoort vir 28 dae in kwarantyn gehou te word. Gedurende dié tyd word diere noukeurig gemonitor vir enige tekens van siekte voordat hulle by die bestaande kudde aansluit. Gesondheidsverklarings of veeartsenykundige sertifikate moet voor aankoop vereis word.
Hierdie stap word beskou as een van die belangrikste maniere om die invoer van siektes te voorkom.
Voertuie en toerusting wat tussen plase beweeg moet ook gereeld skoongemaak en ontsmet word. Dit sluit in wieldippe of spuitbane by plaasingange, die ontsmetting van veewaens voor toegang, die vermyding van die deel van toerusting tussen plase en die gereelde was van hanteringsfasiliteite.
Vorige berigte:
‘Ons bring jou die nuutste Tuinroete, Hessequa, Karoo nuus’
