Video
OUDTSHOORN RUGBYNUUS EN VIDEO - Die A-span van Spring Roses het Prins Albert in 'n SWD Presidentsligawedstryd Saterdag by die Oudtshoorn-sportterrein gemaklik met 28-13 geklop. Roses was nooit in enige stadium in gevaar om die wedstryd te verloor nie en het reeds teen rustyd met 14-3 voorgeloop.
Roses het in die tweede helfte hul dominansie ten volle uitgestal toe hul flambojante losskakel, Attie Goliath, 'n briljante agterhand-aangee uitgevoer het om hul senter, Hanclo Jansen, deur te stuur vir ’n drie onder die pale. Spring Roses se afrigter, Karel Gerhardus, was na die wedstryd vol lof vir sy spelers.
"Dis 'n riem onder die hart vir enige afrigter om te sien dat geoefende bewegings tot op die letter op die veld uitgevoer word, veral teen 'n geoliede span soos Prins Albert. Ons moet egter nie meegevoer raak nie en gefokus bly."
Kyk 'n video hieronder:
Spring Roses se volgende wedstryd is Saterdag teen Harlequins op die Weermag-sportterrein. In nog 'n SWD Presidentsligawedstryd het Collegians vir Harlequins verlede Saterdag met 24-5 geklop.
In 'n SWD Mic Fin Premierligawedstryd het Bridgton op Knysna net-net met 26-25 teen Jaguars vasgeval.
'Ons bring jou die nuutste Oudtshoorn, Klein Karoo nuus'
