OUDTSHOORN NUUSFLITS - 'n Paar plaaslike skole het besonder goed gevaar in die Zibi-sewestoernooi wat die afgelope naweek op die Plate plaasgevind het.
Volgens Deon Carelse, die organiseerder, was die dag 'n reusesukses en was die atmosfeer ongelooflik.
"Die toernooi was uitstekend en die toeskouers het tot 'n wonderlike atmosfeer bygedra. Daar was selfs skole wat volgens tema aangetrek het wat vir 'n nog beter atmosfeer gesorg het," het hy gesê.
Die hoogtepunt van die dag was natuurlik die wedstryd tussen SWD en die Baba Bokkies. Die Bokkies het egter SWD oortuigend met 'n telling van 58-14 gewen. In die agtste minuut het die senter van die Bokkies, Franco van der Berg reeds die eerste drie gedruk. Curwin Bosch, die heelagter, het die drié verdoel.
Die ander puntemakers vir die Bokkies was Mosolwas Mafuma, Bosch, Kwenzo Blose, Manie Libbok en Edwill van der Merwe.
Die finale wenners van die Zibi-sewestoernooi was die o.19-span van Ashton Sekondêr wat hul wedstryd teen Swellendam Sekondêr met 24-0 gewen het. In die o.16 afdeling was dit Hoërskool George wat met die beker weggestap het na hul wedstryd teen Bridgton Sekondêr met 'n telling van 19-10 en in die o.13-afdeling het Colridge Primêr met die beker huis toe gegaan na hul wedstryd teen Haarlem met 'n telling van 22-7.
Lees meer in Vrydag se Oudtshoorn Courant, asook aanlyn.
'Ons bring jou die nuutste Oudtshoorn, Klein Karoo nuus'
