SUID-KAAP NUUS - Die SWD o.20-rugbyspan het Vrydagaand die krane behoorlik oopgedraai in hul wegholoorwinning oor Grens in Oos-Londen.
Die jong Arende het nege drieë gedruk in hul oorwinning van 53-12. Rustyd was die besoekers reeds met 26-7 voor.
SWD het derde geëindig op die punteleer met 55 punte en 'n punteverskil van (+240) in die Curriebeker se o.20-kompetisie.
Die wedstryd is gespeel in winderige omstandighede. Van die begin van die wedstryd het die Arende die bal rondgegooi en met baie goeie bewegings voor die dag gekom.
Grens se voorspelers was geheel en al onder geweldige druk by die skrums en lynstane. Stefan Gerber (haker) het sy springers goed gevind in die lynstane. SWD het in een stadium die bal deur ses fases geneem en Shadward Fillies (regtervleuel) kon afrond met 'n skitterende drie.
Met die goeie spel deur die voorspelers kon die agterspelers baljaar en was die bonusdrie reeds in die eerste helfte gedruk.
Na rustyd het die hoofafrigter van die wenspan, Eddie Myners, 'n paar slim skuiwe gemaak wat onmiddellik vrugte afgewerp het.
Veral die spoedvraat Clide Davids het as plaasvervanger-vleuel die skare op hul voete gehad met sy vaart en voorgevoel vir die spel. Davids het drie pragdrieë gedruk.
Voorlangs het die stutte, Cecil Rittels en Dawie Daffue, PJ Le Roux (slot) , Deveron Lindoor (flank) en Stefan Gerber (haker) die vonk verskaf.
Agterlangs was Justin Bhana (heelagter), Shadward Fillies (regtervleuel) en skakelpaar Maurice White (skrumskakel) en Winrey Stoffels (losskakel) die wenspan se groot planmakers.
Die jong Arende speel nou op Vrydagmiddag 30 September in die halfeindronde teen die Boland in Wellington.
SWD o.20 53(26): Drieë: JP Duvenage (binnesenter), Justin Bhana (heelagter), Shadward Fillies (regtervleuel, 2), Lunathi Nxele (linkervleuel), Maurice White (skrumskakel), Clide Davids (plaasvervanger-vleuel, 3). Doelskoppe: Winrey Stoffels (losskakel, 3), Keanan Tarantraal (plaasvervanger-binnesenter).
Grens o.20 12(7): Puntemakers nie beskikbaar nie.
'Ons bring jou die nuutste Tuinroete, Klein Karoo, Hessequa nuus'
