OUDTSHOORN NUUS - Bridgton-rugbyklub se A-span het Saterdag met 'n skittervertoning van hardlooprugby die span van Groot-Brakrivier in 'n SWD Super A-ligawedstryd van hul voete af gespeel en met die kous oor die kop huis toe gestuur.
Die tuisspan het voor 'n reuseskare, ses pragdrieë aangeteken om die krag-meting met 46 - 29 te wen nadat hy rustyd met 21 - 15 voorgeloop het.
Bridgton se B- en C-spanne het ook oorwinnings behaal.
Vir die A-span het die senter, Juandré Fourie, 'n driekuns aan drieë behaal, terwyl Willem Jafta (vleuel), Adrian Booysen (losskakel) en Jolin Saptou (flank) ook elk eenkeer agter die doellyn gaan kuier het.
Dehovine Johannes (heelagter) het 16 punte met vyf doel-skoppe en twee strafdoele aangeteken.
Ander uitslae:
- Bridgton B wen vs Groot-Brak met 30 - 26
- Puntemakers: Drieë: Jayden-Lee Moos (heelagter), Llyle Metembo (senter), Duzill Avontuur (senter), Darren Coerecius (losskakel). Doelskoppe: Darren Coerecius (2) Strafdoele: Jayden-Lee Moos en Darren Coerecius.
- Bridgton C wen Groot-Brak C met 12 - 0
- Puntemakers: Drieë: Aiden Daniels (heelagter) en Jaydun Samboer (vleuel). Doelskop: Nataniel Fillies (losskakel).
‘Ons bring jou die nuutste Tuinroete, Hessequa, Karoo nuus’
