OUDTSHOORN NUUS - Die nie-winsgewende organisasie, Sport Buddy, het na afloop van hul gholfdag twee weke gelede R2 000 aan die plaaslike danspaar, Amber Saaiman en Envir Goba geskenk.
Saaiman is 'n leerder by Langenhoven Gimnasium en het vroeër vanjaar 'n goue medalje by die SA baldanskampioenskappe in Durban verower. Sy het sedertdien 'n nuwe dansmaat, Goba, gekry wat ook reeds SA baldanstitels verower het.
Saaiman se ma, Gaynor Swartz, het haar dankbaarheid teenoor Sport Buddy uitgespreek en gesê dat die paar randjies handig te pas kom.
"Envir is tans werkloos en tesame met Amber is daar heelwat uitgawes wat gedek moet word sodat hierdie twee hul volle potensiaal kan verwesenlik om eendag hopelik hul land te verteenwoordig."
Goba en Saaiman het tydens die oorhandiging van oor tot oor geglimlag wat volgens Sport Buddy se voorsitter, Sue - Lanya Ewerts, prysloos was. "As bestuurslede is dit 'n riem onder die hart om te sien hoeveel ons opofferinge en reëlings vir hierdie dansers beteken," het sy gesê.
Sport Buddy is vyf maande gelede gestig om belowende sportsterre ongeag hul agtergrond, op enige wyse te help om die hoogste vlak hul onderskeie sportkodes te bereik.
Van links is: Ilca Ewerts, Wyndham Ewerts (stigterslid), Amber Saaiman, Paul Stroebel (klubkaptein), Envor Goba, Sue-lanya Ewerts en Byron Michaels. Foto verskaf
'Ons bring jou die nuutste Oudtshoorn, Klein Karoo nuus'
