SPORTNUUS - Die Oudtshoorniet Yolande de Villiers en Matthys Beukes het die afgelope naweek die botoon gevoer in die 67 km-bergfietsafdeling by die Red Stone-bergfiets en -veldwedlope wat soos gewoonlik by die Red Stone Holiday Farm naby Calitzdorp plaasgevind het.
Sowat 300 fietsryentoesiaste het deelgeneem. Die geleentheid word deur Jakhals Events aangebied.
Die wedren het deel uitgemaak van die Wes-Kaap en Eden-fietsry XCM-reekse. Daar was 'n verskeidenheid deelnemers, insluitend die Zoar Big Shots, Zoar Rising Stars en Oudtshoorn-fietsryklub.
Die wedloop het ook 'n groot aantal skole verteenwoordig wat Langenhoven Gimnasium, Oakdale en Knysna-sportskool ingesluit het.
Nie net was daar baie plaaslike talent teenwoordig nie, maar daar was ook 'n sterk universiteit teenwoordigheid van die Maties Cycling Team en Imbuka.
Die wedloop het 'n uitdagende roete gehad, en deelnemers se uithouvermoë en tegniese vaardighede is behoorlik beproef om die eindstreep te bereik.
Volgens Corné Botha van Jakhals Events, was dit 'n intense wedren en wedloop, maar was daar 'n atmosfeer van kameraadskap en samehorigheid onder die deelnemers. Botha het al die deelnemers, ondersteuners en borge vir hul bydrae tot hierdie suksesvolle geleentheid bedank.
Matthys Beukes klim die bergroete uit met sy fiets. Foto's: Sonette Visser
‘Ons bring jou die nuutste Tuinroete, Hessequa, Karoo nuus’
