SUID-KAAP NUUS - Die Suid-Kaap Sages was vir 'n lang ruk stil. Intussen het so 'n paar manne darem die Nasionale Sages-kompetisie op Cape St Francis gaan bywoon vanaf 4 tot 8 Mei.
"Daar is buiten vir goeie kameraderie en sosiale verkeer gedurende die tyd, nie uitstaande gholfresultate om te rapporteer nie. Sommige manne sê hulle sal moet gaan herbegroot vir die jaar wat gholfballe betref, want op die Linksbaan het jy sommer 'n handvol op een gat verloor. Nou ja, gholf het ook sy pyne," aldus Marius Loubser.
Op hul plaaslike program het 44 spelers op Dinsdag, 19 Mei op Stilbaai bymekaargekom.
"Ongeag die droogte in die Suid-Kaap is Stilbaai se baan in 'n pragtige toestand en ons wil die baanopsigter en sy personeel komplimenteer vir hul harde werk. Baie dankie ook aan André Celliers vir sy organisasie en vir die personeel van die gholfklub vir die hartlike ontvangs." het Loubser gesê.
In die vierbal alliansie, met twee tellings om te tel op elke gat, het twee vierballe los onder die ander uitgespeel. Hulle eindig dan ook gelyk en by Sages gaan alles oor ouderdom en die vierbal met die gesamentlike hoogste ouderdom is dan ook die wenner.
1. Tinus Prinsloo en John van Rensburg (Boggomsbaai) en Daan Botes en John Brink (Stilbaai) 88;
2. Wessel de Bruyn, André Celliers en A Greeff (Stilbaai) en Abel Pienaar (Boggomsbaai) 88;
3. Thys Cronjé en F Putter (Stilbaai) en Fanie Wessels en George Deerans (Boggomsbaai) 83;
4. Gert van Rooyen en James Barnard (Mosselbaai), Neels Lourens (Heidelberg) en J Swart (Stilbaai) 81.
John Brink van Stilbaai wen albei die naaste aan die penne.
"Baie dankie aan JC Slagtery vir hul borg van die twee pryse. Dankie aan Thys Cronjé van Stilbaai wat van die pryswenners se pryse geborg het."
Die volgende Sages-byeenkoms is op Dinsdag, 23 Junie op Riversdal en die formaat is 'n IPS-kompetisie.
'Ons bring jou die nuutste Hessequa, Tuinroete, Klein-Karoo nuus'
