OUDTSHOORN NUUS - As hy jou met 'n paar industriële stewels in 'n padwedloop kafdraf moet jy geen genade verwag wanneer hy by die wegspring langs jou plek inneem in 'n paar duursame drafskoene nie.
Met PSP Timber Industries, Oudtshoorn as sy werkgewer en nou ook sy nuwe borg, is Booi Salman gerat om die bestes van die beste atlete in Suid-Afrika stof in die oë te hardloop.
Sias van Greunen, eienaar van PSP Timber Industries het Salman se talent raakgesien - so ook die wig tussen Salman die atleet en Salman die wenner.
Vir meer as 'n jaar al draf Salman met sy industriële stewels daagliks ongeveer 12 km heen en weer tussen sy werk en huis. Op 43-jarige ouderdom het hy in 2016 besluit om aan wedrenne deel te neem.
Met sy werkstewels as sy enigste 'drafskoene' het Salman op 2 April 2016 vir die eer-ste keer kompeterend deelgeneem, toe hy die KKNK 10 km-volstruiswedloop aangedurf het.
Hy het in 'n tyd van 37:32 algeheel vyfde oor die eindstreep gehardloop en was ook die wenner in die veterane-afdeling - en toe begin sy deelname aan wedrenne in alle erns.
'n Weldoener het Salmal gesien waar hy aan die volstruiswedloop in stewels deelneem en 'n tweedehandse paar drafskoene geskenk. PSP Timber Industries het die tweedehandse drafskoene nou laat ophang en Salman uitgerus met splinternuwe drafskoene en -klere.
So ook sorg Van Greunen en sy span nou dat Salman al die nodige vitamiene-aanvullings en finansiële bystand geniet om uiters kompeterend deel te neem.
Dié borgskap het nie net soos manna uit die hemele geval nie - Salman het ná die Volstruis-wedloop nog nege wedlope aangedurf om sy talent ten toon te stel.
Dié renne is (naam, datum, tyd, posisie klaargemaak):
- Mosselbaai Harriers Groot-Brak 10 km-wedloop; 16 April; 34:23; algeheel vierde en eerste veteraan.
- Hoekwil 10 km-wedloop; 21 Mei; 35:32; algeheel vyfde en eerste veteraan.
- George McDonalds 10 km-wedloop; 25 Junie; 34:38; algeheel agtste en eerste veteraan.
- Mosselbaai PetroSA 10 km-wedloop; 24 September; 34:57; algeheel negende en tweede veteraan.
- De Rust Meirings-poort 12,5 km-wedloop; 15 Oktober; 43:25; algeheel twee-de en eerste vete-raan.
- George - The Farm Run 10 km-wedloop; 29 Oktober; 36:10; algeheel derde en eerste veteraan.
- Mosselbaai - Die Ernst Louw-gedenkwedloop; 3 Desember; 34:46; algeheel vierde en tweede veteraan.
- George Palm Tyres 10 km-wedloop; 10 Desember; 34:43; algeheel vyfde en eerste vete-raan.
- Oudtshoorn Bestmed-straatmyl; 17 Desember; 4:33; eerste veteraan.
Salman is nou 'n lid van die Nedbank-atletiekklub. Oor die feit dat hy konstant onder die topvyf algehele posisies is, sê hy: "Ek sien hulle naderkom. Nie van agter nie. Ek kom nader aan hulle.
Ek haal hulle stadig maar seker in. Hou my dop. Ek gaan hulle wen."
ARTIKEL & FOTO: CHRISTO VERMAAK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
