OUDTSHOORN NUUS - Laerskool Laurus op Oudtshoorn is onlangs deur Krieket Suid-Afrika (KSA) vereer vir sy uitstaande bydrae tot die ontwikkeling van jeugkrieket en die sukses van die KFC Minikrieket-program.
Die toekenning is deur KSA se uitvoerende hoof, Pholetsi Moseki, oorhandig as erkenning vir die skool se jare lange betrokkenheid by die ontwikkeling van jong krieketspelers en die bevordering van deelname aan die sport.
In ’n waarderingsbrief sê KSA die skool het deur die jare onwrikbare toewyding getoon om kinders die geleentheid te gee om deur krieket te leer, te ontwikkel en selfvertroue op te bou.
Volgens KSA strek die impak van Laurus se betrokkenheid veel verder as die krieketveld. Die skool het ’n belangrike rol gespeel om krieket toeganklik te maak vir jong spelers en het gehelp om die grondslag te lê vir toekomstige skool-, klub-, provinsiale en selfs nasionale krieketspelers.
“Die sukses van Suid-Afrikaanse krieket begin op grondvlak, en skole soos Laerskool Laurus vorm die kern van daardie sukses. Die geleenthede wat die skool aan jong spelers bied, help om nie net toekomstige sportlui nie, maar ook leiers en verantwoordelike burgers te ontwikkel,” lui die brief.
Krieket Suid-Afrika het ook die skool se opvoeders, afrigters, koördineerders en ondersteuningspersoneel geloof vir hul passie en toewyding om positiewe ervarings vir jong spelers te skep.
Volgens die organisasie het Laurus as vennoot van die KFC Minikrieket-program ’n betekenisvolle bydrae gelewer om die sport toeganklik, inklusief en verteenwoordigend van diverse gemeenskappe te hou.
Moseki het die skool bedank vir sy getroue ondersteuning deur die jare en gesê die nalatenskap van die skool se bydrae sal voortleef in die ontwikkeling van toekomstige geslagte krieketspelers en die groei van die sport in Suid-Afrika.
‘Ons bring jou die nuutste Tuinroete, Hessequa, Karoo nuus’
