DYSSELSDORP NUUS - Die Wes-Kaapse provinsiale minister van behuising en infrastruktuur, Tertuis Simmers, het verlede Woensdag titelaktes aan 233 huiseienaars in Dysselsdorp oorhandig wat die afgelope twee jaar nuwe huise ontvang het.
Die dag se verrigtinge is deur raadslid Christina Muller en die munisipale bestuurder, Walter Hendricks, geopen.
Die burgemeester van die Groter Oudtshoorn, Chris Macpherson, het Simmers verwelkom en beklemtoon hoe spesiaal dit is om hierdie titelaktes aan diegene wat sowat twee jaar gelede huise van die provinsiale regering ontvang het, te oorhandig.
"Baie geluk aan almal van julle namens myself en die raad. Jou eienaarskap is 'n teken van ons gedeelde verbintenis om 'n beter toekoms vir ons gemeenskap te bou."
Simmers het op sy beurt gesê dat hy 'n spesiale poging aangewend het om die geleentheid by te woon en om die titelaktes persoonlik te oorhandig.
"Die behuisingsprojek het twee jaar gelede begin, en vir ons almal gaan dit oor die transformerende impak wat dit op ons gemeenskappe het. Wanneer ons 'n huis bou en die titelaktes aan jou oorhandig, plaas ons 'n seël op die toekoms wat ons almal begeer. Hierdie titelakte verander lewens aansienlik en verleen eienaarskap van die grond wat jy nou tuiste noem."
Hy het ontvangers versoek om die belangrikheid van dié dokument te waardeer en gesê: "Respekteer die belangrikheid van hierdie dokument; beveilig dit. Dit is nou in u hande, en saam met die munisipaliteit kan ons saamwerk om 'n beter toekoms vir julle almal te bou. Eiendomsreg en verantwoordelikheid gaan hand-aan-hand. Julle is nou die trotse eienaars van die grond waarop julle huise staan. As 'n gemeenskap is ons vennote, en eienaarskap beteken om saam te werk om die gemeenskap te bou, 'n gevoel van eenheid, voorspoed en gedeelde verantwoordelikheid vir die welstand van al sy inwoners te bevorder."
Die oudste ontvanger van 'n titelakte 'n 87-jarige vrou, Elizabeth Boois, wat gewys het hoe hierdie behuisingsinisiatief in Dysselsdorp 'n positiewe impak op mense van alle ouderdomme maak.
'Ons bring jou die nuutste Oudtshoorn, Klein-Karoo-nuus'
