SUID-KAAP NUUS - Die 20ste George Oumotorskou vind op 13 en 14 Februarie in George plaas.
Die Oumotorskou lok jaarliks honderde deelnemers wat hul veteraan en ou voertuie wat voor 1975 vervaardig is kom uitstal. Daar is ook kategorieë waarin uitstallers hul veteraantrekkers, statiese masjiene, veteraan- en moderne motorfietse, omgeboude motors en die nuutste modelle op die mark kan uitstal.
“As deel van die 20ste herdenking van die skou, sal hoogtepunte uit die afgelope twee dekades weer aangebied word,” sê Mike Alexander, koördineerder van die Suid-Kaap Oumotorklub se skoukomitee wat die skou aanbied.
“Eienaars van Amerikaanse voertuie is spesiaal genooi om hul motors in die Sirkel van Faam uit te stal,” sê Alexander. Verlede jaar het die rooi vuurwaens wat aangesluit het by die Valentynsdagtema dié ereplek op die skou beklee. “Voortaan sal voertuie wat in die verskillende lande vervaardig is ‘n beurt kry om hier te staan.”
Volgens Alexander gaan die verbyrit van voertuie in 2016 ‘n hoogtepunt wees. “Dit gaan so aangebied word dat toeskouers van waar hulle sit en kuier die voertuie in al hul glorie kan bewonder.”
Volgens Alexander sal besoekers kans kry om deel te neem aan ‘n splinternuwe fotokompetisie wat op sosiale media aangebied word. “Om deel te neeem aan die kompetisie moet besoekers saam met dames in periode-kostuums by die motors poseer sodat fotograwe hul foto kan neem en inskryf vir die kompetisie,” verduidelik Alexander.
Die skou word vir die 10de jaar voorafgegaan deur ‘n toer van veteraanmotors, wat bekendstaan as die Vettoer.
Eienaars van voertuie wat sonder voorwielremme vervaardig is word genooi om aan die 2016-Vettoer deel te neem.
“Deelnemers vanoor die hele land kom Donderdagmiddag 11 Februarie by die Albertinia Hotel bymekaar vanwaar hulle op 12 Februarie na George vertrek,” sê Philip Kuschke wat die Vettoer reël. “Vanjaar se Vettoer is besonders in die opsig dat die deelnemers eers ‘n draai in die Gondwana Natuurreservaat naby Herbertsdale gaan ry.”
‘n Veiling wat weer deur The House of Classic and Sports Cars van Knysna wat Saterdag aangebied word, beloof om weer baie belangstelling uit te lok. Verlede jaar is die hoogste bod van R160 000 op ‘n 2008 Austin Healy Cooper replika toegeslaan, terwyl ‘n 1969 Rolls Royce Silver Shadow vir R147 000 verkoop is.
Ignatius Anker, wat die uitstalling van modelmotortjies koördineer, beloof 2016 se uitstalling gaan opwindender wees as 2015 se kamers vol karretjies. “Meer as 5000 modelvoertuigies sal uitgestal word. Van hulle sal te koop aangebied word vir diegene wat hul eie versamelings wil begin.”
Naas die immergewilde biertuin sal daar ook eet- en drinkgoed by verskeie stalletjies te koop wees. Hierdie stalletjies word bedryf ten bate van verskeie organisasies sowel as die PW Botha Kollege, op wie se terrein in Yorkstraat die skou aangebied word.
‘n Gedeelte van die skou se opbrengs word geskenk aan verskeie liefdadigheidsorganisasies.
Alle uitstallers wat hul spogryding vir inskryf vir die 2016 George Oumotorskou moet vooraf inskryf op die webblad http://www.scocc.co.za/
- Algemene navrae: Mike Alexander – 082 495 4780
- Modelmotors: Ignatius Anker - 082 442 9875
- Vettoer: Phillip Kuschke - 082 856 5152
- Uitstallers: Krige Bolton - 082 475 7855
- Crankhandle Klub: Harvey Metcalf - 083 415 1066
- The House of Classic and Sports Cars: 044 382 1000, 082 566 7897 of info@hocasc.co.za
'Ons bring jou die nuutste Klein-Karoo, Tuinroete nuus'
