OUDTSHOORN NUUS - Die Wes-Kaapse departement van gesondheid het bekendgemaak dat 172 babas op Kersdag in staatshospitale in die streek gebore is.
Dit sluit 93 seuntjies en 79 meisies in. Die eerste drie Kersbabas is tussen 00:00 en 00:11 gebore. Die eerste Kersbaba was 'n meisie met 'n gewig van 2.94kg en is gebore in die Hermanus-hospitaal. Die tweede Kersbaba was ook 'n meisie wat in die Paarl-hospitaal gebore is met 'n gewig van 3.26kg. Die derde Kersbaba was 'n seuntjie met 'n geboorte-gewig van 3.43kg in die Mowbray-hospitaal.
Die Wes-Kaapse departement van gesondheid en welstand meen die eerste duisend dae van 'n kind se lewe, van bevrugting, is van kritieke belang vir hul ontwikkeling. Die fisiese, sosiale en breinontwikkeling wat gedurende dié tyd plaasvind, is 'n eenmalige geleentheid om 'n stewige grondslag vir gesondheid, leer en goeie verhoudings in die toekoms te bou. Dit is 'n belangrike tyd om jou kind se ontwikkeling te ondersteun deur voldoende voeding en inentings - én om vir jou kind te lees.
Minister Mireille Wenger sê: "Op hierdie vreugdevolle Kersdag wil ek my hartlike gelukwensing uitspreek aan die gesinne wat hul kosbare kleintjies in die wêreld verwelkom. Ek wens die nuwe moeders al die liefde, gesondheid en geluk toe wanneer julle vertrek op hierdie ongelooflike reis van moederskap Mag jou baba se koms nog meer vreugde en lig in jou hart bring. Ons vier nie net die wonder van die lewe nie, maar ook die hoop en geluk wat hierdie nuwe begin vir ons gemeenskappe bring. Ek wil ook ons gesondheidsorgwerkers, vroedvroue en ander personeellede bedank wat in die feesseisoen in die Wes-Kaap gewerk het. Ons bly dankbaar vir alles wat julle doen en eer jul toewyding op hierdie spesiale dag."
Die Wes-Kaapse departement van gesondheid en welstand wens die ouers geluk met die veilige aflewering van al die nuwe aankomelinge op Kersdag. "Ons sien daarna uit om deel van hul ontwikkelingsreis te wees."
‘Ons bring jou die nuutste Tuinroete, Hessequa, Karoo nuus’
