OUDTSHOORN NUUS & VIDEO - 'n Groep vrouens van Oudtshoorn wat drie politieke partye (Icosa, ANC en Sarco) verteenwoordig en hulself beskryf as vegters vir die regte van vroue en kinders, het verlede Vrydag versoekskrifte aan verteenwoordigers van die Oudtshoorn-landdroshof en Oudtshoorn-munisipaliteit oorhandig.
By die landdroshof het die area-hofbestuurder, Royden Boonzaaier die vroue se versoekskrif onderteken en 'n kopie in ontvangs geneem.
Oudtshoorn-onderburgemeester, Noluthando Mwatie, het die munisipaliteit verteenwoordig en die versoekskrif in ontvangs geneem.
Mwatie het met ontvangs van die versoekskrif gesê: "Vroue is belangrike elemente in die gemeenskap.
As vroue toegelaat word om deel te word in besluitneming van Oudtshoorn, kan ons as vroue die ekonomie van vroue bevorder. Ons kan korrupsie en werkloosheid verminder en armoede verlig.
Vroue het die reg dat hul stem gehoor word. Ons kan as 'n eenheid saamwerk en die gemeenskap bemagtig."
Mina Fortuin het namens die vroue gesê: "Nepotisme by die Oudtshoorn-munisipaliteit moet gestaak word." Sy het ook gesê: "Ons soek ons munisipaliteit terug van die inkommers wat nou in die kantore sit."
Die versoekskrif aan die munisipaliteit is deur die sameroeper van die vroue, Nomsa Jaxa, onderteken.
Die versoekskrif bevat bykans twintig punte, waarvan die volgende op vroue en kinders van toepassing is:
- Vroue word opsetlik weggelaat uit gesprekke en forums waar daar oor vrouekwessies gepraat word.
- Vroue uit alle rasse, politieke affiliasie en gebiede moet deel wees van die Gender Desk. Die Oudtshoorn-munisipaliteit moet inkoop by bestaande programme van nie-winsgewende organisasies
- Plaaslike kinders moet voorkeur kry met opleiding en poste.
- Daar vind geen bemagtiging van vroue in die dorp plaas nie.
- Programme moet deur die munisipaliteit in werking gestel word wat transformasie en gelykheid bevorder in ons dorp.
- Geen borg vir verkragters en moordenaars.
- Die uitbetaling van onderhoud moet bespoedig word. Deelnemende bestuur saam met vroue uit die gemeenskap moet bevorder word.
- Geleenthede waar vroue weer in die landdroshof opgelei word oor hoe om uitsettingsbevele, interdikte en vry egskeidings te kry moet weer aangebied word.
- Gereelde besprekings met vrouens ten opsigte van statistiek rondom geweld teen vroue en kinders.
Beide Boonzaaier en Mwati het onderneem om aandag te gee aan die vroue se eise en klagtes.
Kyk 'n video hieronder:
Die vroue, voor die munisipaliteit, waar 'n versoekskrif oorhandig is.
ARTIKEL, FOTO & VIDEO: CHRISTO VERMAAK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
