OUDTSHOORN NUUS - Twee herwinningsvoertuie, wat onderskeidelik van Beaufort-Wes en Kaapstad is, het sowat 'n uur gelede op die ongelukstoneel in die Swartbergpas aangekom om die vragmotor wat gisteroggend omgeslaan het, uit die rivier te sleep.
Die voertuie is van dieselfde maatskappy en ‘n kundige van die onderneming uit Bloemfontein koördineer die operasie.
Dit blyk dat die proses tussen vyf en agt ure gaan duur, so dis onwaarskynlik dat die pas teen vanmiddag oop sal wees.
Volgens die Tuinroete-distriksmunisipaliteit se brandweerhoof, Deon Stoffels, is die chemiese storting in bedwang gebring.
Diesel het uit die trok geloop na die voertuig met ‘n vrag koring op die eerste draai van die pas omgeslaan het. Van die koring het ook in die rivier beland en gelukkig gehelp om die diesel te absorbeer.
Reddingspanne het verskeie klein strome wat stroomaf na ander riviere lei met absorberende kussings en turf versterk om verdere besoedeling te voorkom. Die pas is tot verdere kennisgewing gesluit vir alle verkeer.
Absorberende bome is strategies oor die waterloop geplaas en met rotse vasgemaak om 'n versperring te skep wat enige besoedelingstowwe opvang voordat dit die stroom kan binnedring. 'n Industriële olie-absorberende materiaal is ook langs die rivierstrome vanaf die hoofpad aangewend, wat 'n binnenshuise/bykomende beskermende laag vorm om enige gestorte chemikalieë te absorbeer. Foto: Tuinroete Distriks Munisipaliteit
Foto's: Verskaf
‘Ons bring jou die nuutste Tuinroete, Hessequa, Karoo nuus’
