OUDTSHOORN NUUS - Die saak teen 'n Chinese burger wat aangekla word van sameswering om 'n moord te pleeg is verlede Donderdag in die Oudtshoorn-streekhof vir die soveelste keer uitgestel, die keer om 'n geskikte tolk te vind.
Die 47-jarige Gaushun Gao, wat sedert Mei verlede jaar in aanhouding is, word daarvan aangekla dat hy twee mans van Pacaltsdorp gehuur het om die voormalige eienaar van die Bagley's Nagklub op Oudtshoorn, Julia Bagley, te vermoor.
Die twee mans het koue voete gekry en die polisie oor Gao se planne ingelig. Hy is nog dieselfde aand in hegtenis geneem en is later borgtog geweier.
Gao het glo ook na sy inhegtenisneming doodsdreigemente uit die gevangenis aan Bagley en haar kinders gestuur.
Volgens die beskuldigde se regsverteenwoordiger, mnr. Daan Dercksen van Knysna, het dit tydens voorbereiding vir die saak aan die lig gekom dat die tolk, Shumeng Huang, ook bekend as Monica, destyds die fasiliteerder was in die transaksie van die verkoop van die nagklub en dus nie genoegsaam verwyderd van die saak is om billike en objektiewe vertolking van getuienis te gee nie.
Volgens Derksen is daar agt dialekte van Mandaryns in die wêreld. Die beskuldigde praat Fuqing-hua, 'n dialek wat slegs deur sowat 'n miljoen Chinese gepraat word.
"Die tolk wat beskikbaar is, is Taiwannees-sprekend en onderleg in Mandaryns, maar dra geen kennis van die dialek wat Gao praat nie."
Sy was gisteroggend om 09:15 nog op pad vanaf George na Oudtshoorn toe sy meegedeel is dat haar dienste nie meer nodig is nie.
Streeklanddros Mark van Wyngaardt het die saak tot 7 Oktober uitgestel sodat 'n tolk wat die beskuldigde se taal praat, gevind kan word. Adv. Michelle Weyers is die aanklaer.
Lees vorige artikels:
- Huurmoord-saak voor in streekhof
- Opvolg: Chinese huurmoordsaak
- Chinees se huurmoordsaak uitegestel
- Opvolg: Chinees kry nie borg
- Huurmoordsaak: Chinees weer in hof
- Chinees in hof vir beweerde huurmoordpoging
- Opvolg: Chinees nader glo 2 mans om moord te pleeg
ARTIKEL: GARNETT WICOMB, OUDTSHOORN COURANT KORRESPONDENT
'Ons bring jou die nuutste Oudtshoorn, Klein-Karoo nuus'
