OUDTSHOORN NUUS - Die Wes-Kaapse minister van kultuursake en sport, Ricardo Mackenzie, het die afgelope naweek 'n bedrag van R150 000 aan die Oudtshoorn-munisipaliteit oorhandig om feesaktiwiteite in die dorp te ondersteun.
Die oorhandiging het plaasgevind tydens 'n spesiale geleentheid in Oudtshoorn waar Mackenzie tjeks aan die burgemeesters en onderburgemeesters van die munisipaliteite in die Tuinroete-streek oorhandig het.
Die begunstigdes sluit Mosselbaai, Knysna, met spesifieke ondersteuning vir die Knysna Oesterfees, George en Hessequa in.
Volgens Mackenzie speel sport- en kultuurfeeste 'n belangrike rol in gemeenskapsontwikkeling.
"Die departement van kultuursake en sport glo in die krag van sport- en kultuurfeeste om werk te skep, toerisme te laat groei en plaaslike ekonomieë te stimuleer, veral in ons kleiner dorpe."
Die totale bedrag wat die departement aan die vyf munisipaliteite beskikbaar gestel het, beloop R620 000.
"Ons is trots om hierdie streke te ondersteun terwyl hulle voorberei om opwindende geleenthede aan te bied wat mense bymekaarbring en ekonomiese ontwikkeling bevorder," het Mackenzie afgesluit.
‘Ons bring jou die nuutste Tuinroete, Hessequa, Karoo nuus’
