OUDTSHOORN NUUS - Die Groter Oudtshoorn-munisipaliteit het goedkeuring van die departement van omgewingsake en ontwikkelingsbeplanning (DEADP) ontvang vir 'n plan om die Grobbelaarsrivier te herstel wat deur onlangse vloede aangerig is.
Hierdie goedkeuring laat die munisipaliteit toe om die rivier op te ruim en te herstel, met die fokus op die verwydering van puin en die herstel van skade wat vroeër vanjaar deur vloede veroorsaak is.
Aurelia Mle, mediawoordvoerder, Oudtshoorn-munisipaliteit noem dat na die munisipaliteit middel Augustus goedkeuring gekry het, het spanne dadelik begin om die rivier skoon te maak en beskadigde infrastruktuur naby Albertstraat te herstel.
"Hierdie inisiatief sal uitgebrei word om aan bykomende areas vroeg in September aandag te gee. Die fokus sal wees op die rivierstrek vanaf die keerwal agter die Caves-aftreeoord tot by die spoorwegbrug by Rademeyerstraat. Dit sal verdeel word in ses afdelings om die werk meer hanteerbaar te maak en sal na verwagting ongeveer drie maande neem, afhangende van begrotingsgoedkeuring."
Uitdagings
Daar is 'n paar uitdagings met toegang tot sekere gebiede, wat dit moeilik maak om al die nodige werk te assesseer. Eienaars van eiendom langs die rivieroewer, wat skade ondervind het, word aangemoedig om Chris Swart by swartc@oudtmun.gov.za te kontak vir bystand.
Die munisipaliteit sal hierdie areas assesseer en waar moontlik by die skoonmaakpogings insluit. Privaat grondeienaars en belanghebbendes wat deel wil wees van hierdie inisiatief word aangemoedig om met Chris Swart in verbinding te tree.
R300 000 begroting
'n Span gelei deur die infrastruktuur-afdeling, parke en ontspanningsdepartement en die omgewingskantoor sal toesig hou oor hierdie projek. Die begroting vir hierdie poging word op R300 000 geraam, wat die indiensneming van EPWP-werkers vir die projek se duur insluit.
Tans is daar geen spesifieke begrotingstoewysing nie, maar die departement van water en sanitasie het hom daartoe verbind om sekere kostes te dek.
Dit is belangrik om daarop te let dat hierdie aanvanklike fase nie take behels soos die verwydering van uitheemse plante of riete of die verfraaiing van die rivieroewers nie.
Hierdie take sal aandag kry sodra die rivierinstandhoudingsplan op 'n latere stadium ten volle geïmplementeer is.
Daar word verwag dat die suksesvolle voltooiing van hierdie projek beide die gemeenskap en infrastruktuur op 'n omgewingsvriendelike manier sal bevoordeel.
‘Ons bring jou die nuutste Tuinroete, Hessequa, Karoo nuus’
