BEAUFORT-WES NUUS - Die leeumannetjie wat twee weke gelede uit die Karoo Nasionale Park naby Beaufort-Wes weggeloop het, het nou glo na die Noord-Kaap verkas.
"Die leeu is op die plaas Daggafontein in die Noord-Kaap opgemerk," het Déan Gous, voorsitter van Agri Sentraal Karoo Donder-dagoggend gesê. "Die leeu is tussen Leeu-Gamka en Frazerburg 16km wes van die Theekloofpas opgemerk."
Volgens Gous het parkpersoneel en polisiespoorsnyers nuwe moed geskep omdat die omgewing op die plato platter en nie so klowerig is nie.
Gous het gerugte ten sterkste ontken dat die soekspan tou opgegooi het om die leeu aan te keer. "Dis onwaar dat die leeu nou maar aan die genade van die boere oorgelaat gaan word," het Gous beklemtoon.
"Die leeu sal nie goedsmoeds van kant gemaak word nie, maar eerder deur 'n veearts verdoof en teruggeneem word na die park."
Die driejarige leeumannetjie het sowat twee weke gelede by Brandewynsgat in die noordwestelike hoek van die park deur 'n beskadigde mat in 'n rivierloop wat deur vroeer deur swaar reens uitgespoel is, die park verlaat.
Daarna is sy spoor op Kobus Marais se plaas Muggefontein opgemerk waarna hy 'n koedoe in daardie omgewing platgetrek en daaraan gevreet het.
"Sondagaand het spoorsnyers sy spoor gelos in 'n klopie op Thomas Marais se plaas Wamakers-kraal in die omgewing van Tafelberg," het Gous gesê.
Intussen het die leeu verder aangestap en bevind hom nou op die plaas iewers in die Noord-Kaap.
Volgens Gous, wat dikwels in die Karoo Nasionale Park kom, is die jong leeumannetjie waarskynlik deur ouer, meer dominante leeumannetjies uitgedruk en hy moet sy eie gebied vind.
Agt leeus – twee mannetjies, twee wyfies en vier welpies is in 2010 in die park vrygelaat. Die leeus het intussen aangeteel tot 12, waarvan die een nou die pad gevat het.
Dit was die eerste keer in 103 jaar dat daar weer leeus in die gebied voorgekom het nadat die laaste leeu in die omgewing tussen 1842 en 1857 in die Prins Albert/Leeu-Gamka-gebied geskiet is.
Die park van 98 000 ha is groot genoeg om ten minste 20 leeus te onderhou met die soogdierspesies wat daar voorkom. Leeus vang net eenmaal elke vierde, vyfde dag 'n prooi, afhangend van hoe groot die leeutrop en die prooi is.
Vorige artikels:
- Helikopter ingespan vir leeu-soektog
- Leeu speel wegkruipertjie
- Opvolg: Spore gevind na leeu ontsnap
- Lion breaks out of Karoo National Park
Verwante artikels:
- Lion Park death: Photo of moment tourist was attacked
- Tourist killed by lion was Game of Thrones video editor
- Fatal lion attack: Witness account
ARTIKEL: TISHA STEYN, OUDTSHOORN COURANT KORRESPONDENT.
