OUDTSHOORN NUUS - Jabari, Bulelo en Malaika van Buffelsdrift het seker lanklaas so ‘n versigtige lotjie gesien as die 20 seuns van Huis Triomf op Oudtshoorn.
Die leerders het op die laaste skooldag van die jaar die wildplaas buite Oudtshoorn besoek om nader kennis te maak met die olifante.
Die olifante is met ‘n lang arm vanaf ‘n veilige afstand gevoer, en die dapperes het op 'n olifant se knie gesit sodat ‘n foto geneem kan word, voordat die kinders self op die houtdek van die grasdak restaurant versnaperings geniet het.
Die leier van 'n groep jongmense wat die seuns Buffelsdrift toe vergesel het en een maal per week saam met die kinders sokker, rugby of krieket speel sê: “Ons het by die kinders betrokke geraak om hulle te help met sport. Ons is agter die skerms besig – die fokus is op die kinders”.
Volgens een van Huis Triomf se ouer seuns is die betrokkenheid van die groep nie tevergeefs nie, “Ek wil vir pastoor gaan studeer. Ek wil ‘n verandering in my lewe maak sodat ek ook ‘n verandering in ander se lewens kan maak. Ek doen dit vir my ma...”
“Ons het die kinders genooi uit die liefde van ons hart - ons wil vir hulle iets gee wat hulle nie onder normale omstandighede sou gehad het nie,” sê Andries van Schalkwyk, mede-eienaar van Buffelsdrift.
“Huis Triomf is ‘n kinderhuis waar kinders van tussen 8 en 17 jaar deur die hof geplaas word, hoofsaaklik omdat die kinders tuis verwaarloos word, maar ook om ander redes,” verduidelik Irma Olivier, hoof van die kinderhuis.
Die kinders kom van oral in die Suid-Kaap. Hulle gaan skool, maar word ook betrek by ontwikkelingsprogramme wat vir hulle lewensvaardighede leer. “Sport en ontspanning, wat deur die groep jongmense aangebied word, is ‘n baie belangrike deel hiervan, want dit leer die kinders dissipline en spanwerk. Die jongmense se noue betrokkenheid by sportdeelname help ook dat die kinders se potensiaal raakgesien word.”
Benewens Olivier is ‘n maatskaplike werker en sewe versorgers ook by die kinders betrokke.
Die kinderhuis, wat onder die vaandel van die ACVV bedryf word, word deur die staat gesubsidieer, maar is verder afhanklik van donasies en skenkings. “Beddegoed en klere is altyd welkom,” sê Olivier.
Kontak Olivier by 082 698 9497 of triomfccv@mweb.co.za vir meer inligting.
Die seuns van Huis Triomf was aanvanklik maar bra versigtig vir die drie Grootvoete. Foto: James Crause
ARTIKEL: TISHA STEYN
'Ons bring jou die nuutste Oudtshoorn, Klein-Karoo nuus'
