OUDTSHOORN NUUS - Gaudner Govere (24), die Zimbabwiese busbestuurder van die Intercape-bus wat in Mei vanjaar in ’n ongeluk op die George-pad betrokke was se verhoor het verlede week in die Oudtshoorn-streekhof begin.
Die verhoor dien voor ’n besoekende landdros, Kenith Petersen. Adv. William King en Karin Alheit tree in opdrag van Govere se prokureur, Vaughn Shone op en adv. Mornay Jullies tree as staatsaanklaer in opdrag van adv. Michelle Weyers op.
Govere staan tereg op 10 klagtes van strafbare manslag sowel as die oortreding van die immigrasie wet. Die ongeluk het in die vroeë oggendure gebeur toe Govere in die berugte haarnaalddraai beheer oor die dubbeldekkerbus verloor het. Die bus was vanaf Kaapstad na Queenstown onderweg.
Ses van die staatsgetuies het Donderdag en Vrydag getuig. Die eerste getuie wat geroep is, was konst. Brenwill Blok. Hy was die polisiebeampte wat eerste op die toneel was en het getuig dat agt passasiers op die toneel dood is.
Chevonne Dirks, die buswaardin wat ten tyde van die ongeluk saam met Govere op die bus was, het in ’n hartroerende getuienis verduidelik wat die aand van die gru-ongeluk gebeur het. Volgens haar was dit Govere se eerste keer wat hy dié pad alleen na sy opleiding gery het. Dit was ook die eerste keer wat sy saam met Govere in ’n bus gery het. Sy vertel dat die bus laat vertrek het as gevolg van die feit dat die bus in die Kaap ’n lekkasie gehad het. ’n Ander bestuurder het vanaf Kaapstad na Swellendam bestuur waarna Govere in Swellendam oorgeneem het.
Volgens Dirks se getuienis het Govere op Mosselbaai ’n verversingstop gemaak. Sy het langs hom in die bus gesit. Hulle het daarna na George gery waar sy ’n shuttle-drywer gevra het om hulle uit George te begelei omdat nie sy of Govere die pad uit George geken het nie.
“Hy het ’n oproep van ons kantoor af gekry om hom geluk te wens met die feit dat hy so mooi gery het en ek het die foon vir hom aangegee. Hy was omtrent een minuut op die foon. Hy het by die vurk die afdraai na Oudtshoorn gemis en ek het vir hom gesê hy moet in plaas daarvan om te reverse net by die Uniondale-afdraai links draai na Oudtshoorn toe. Ek het op ’n stadium gesien hy ry ongeveer 90km/h en vir hom gevra om stadiger te ry omdat die bus op die pad geskud het. Hy het gesê ons is klaar laat en ek het vir hom gesê, “rather late than dead,” het sy getuig.
Dirks sê sy het omtrent vir 10 minute aan die slaap geraak toe sy van ’n kap geluid wakker word.
“Die bus was aan die eenkant hoër as aan die ander kant en ek het op sy skoot geval. Ek het hom gevra wat hy gedoen het, maar hy het my nie geantwoord nie. Hy het net ’n ruit uitgeskop sodat ek na my passasiers kan omsien. Drie van hulle het agter die bus gelê en was dood. Ek het die ander bestuurder wat in die slaapkompartement was wakker geskree.
"Toe ek vir Gaurdner soek het hy agter gesit en ’n vrou wat besig was om te sterf getroos. Haar 5-jarige seuntjie het met ‘n gebreekte been by haar voete gesit en huil. Hy het soos ‘n zombie gelyk terwyl hy haar sit en troos het. Ek het by hom gaan sit en gesê dat alles oraait gaan wees en dat ons saam in die ding is,” vertel sy.
In haar getuienis het Dirks gesê die ongeluk het ’n groot impak op haar lewe en dat sy nog die mense kan hoor skree as sy haar oë toemaak.
Nóg ’n polisiebeampte sowel as ’n passasier het getuig. ’n Deskundige van MTN wat data analiseer het ook kom getuig en gesê dat daar ’n klomp keer internet aktiwiteite op Govere se selfoon was tussen 12:00 en 01:35 net voor die ongeluk gebeur het. Sy kon egter nie sê of hy sy selfoon fisies in sy hande gehad het toe die internet gebruik is nie.
MMeli Coko van binnelandse sake het oor die geldigheid van die paspoort en werkspermit getuig en gesê dat beide onwettig is.
Petersen het die saak tot 22, 23 en 24 April 2015 uitgestel sodat die verhoor kan voortgaan.
Die grusame ongelukstoneel nadat die bus wat op die sykant gelê het, regop getrek is. Foto: Hannes Visser.
ARTIKEL: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshoorn, Klein-Karoo nuus'
