Update
GEORGE NUUS – ’n Stop op die regte plek op die regte tyd het dalk Leigh Barnard (35) van Oudtshoorn sy groot kontantprys besorg.
Ná hy Woensdag 23 Julie as die wenner van Kfm se gewilde 20K Pop Quiz aangewys is, het Leigh later aan die George Herald vertel dat een van die vrae was: “Spell chandelier.”
En glo dit of nie, hy het juis by Chandelier Game Lodge net buite Oudtshoorn gestop om die oproep te neem.
“As ek nie daar gestop het en die naam op die bord gesien het nie, sou ek dit seker met twee l’e gespel het,” lag hy. “Daardie toevalligheid het my gered!”
Leigh, wat elke dag tussen Oudtshoorn en George pendel vir sy werk by die landdroskantoor, het hom dié oggend vir die kompetisie ingeskryf – iets wat hy nie gewoonlik nie doen nie.
“Ek kon nie glo toe hulle my net 15 minute later bel nie,” sê hy.
Een van die vrae wat hy moes antwoord, was wie die wenner was tussen Suid-Afrika en Nigerië in die Women’s Africa Cup of Nations-halfeindstryd – ’n antwoord wat hy reg gehad het.
“Ek kyk baie sport. Dis iets wat ek in my vrye tyd doen. Ek het rêrig gehoop daar kom sportvrae op – en toe doen dit!” sê hy.
Hy sê sy metgeselle in die motor, Nicole Williams en Gerhard Julies, het hom kalm gehou deur die hele proses.
“Hulle het my kalm gehou en letterlik oor die wenpaal gedra,” sê hy dankbaar.
Wat gaan hy met die R20 000 doen? “Springbokkaartjies! Ek en my metgesel gaan regstaan vir ’n wedstryd of twee,” sê hy met ’n breë glimlag.
Die 20K Pop Quiz word daagliks op die ontbytprogram Darren, Sherlin & Sibs op Kfm 94.5 in samewerking met Suzuki aangebied.
Lees 'n vorige artikel: George-hofman wen groot op KFM
‘Ons bring jou die nuutste Tuinroete, Hessequa, Karoo nuus’
