OUDTSHOORN NUUS - Oudtshoorn Courant het na aanleiding van die vragmotorongeluk by Riemvasmaak, Donderdagaand, 15 Augustus, 'n navraag aan die Oudtshoorn-munisipaliteit, asook die uitvoerende burgemeester, Johan Allers gestuur. Dit gons sedert Donderdagaand op sosiale media oor die ongeluk, met verskeie opinies wat gelug word oor wat gebeur het, en wie verantwoordelik is vir die skade.
Waarskuwing
Buiten 'n verbintenis ter ondersteuning is 'n waarskuwing ook uitgereik aan inwoners in die omgewing, wat vrag uit die vragmotor geneem het, om dit nie te verbruik nie, aangesien dit nie veilig is vir menslike gebruik nie.
Die skade aan die huis is astronomies. Foto: Louise Mouton
So sê die munisipaliteit
Aurelia Mle, woordvoerder van die Oudtshoorn-munisipaliteit het as volg reageer:
"Die Groter Oudtshoorn-munisipaliteit reageer tans op 'n ernstige voorval wat Donderdagaand in Rosevalley plaasgevind het. 'n Vragmotor het teen twee HOP-huise gebots en die eiendomme ernstig beskadig en onbewoonbaar gelaat. Die vragmotorbestuurder is in die hospitaal met ernstige beserings. Onmiddellike stappe is deur munisipale raadslede en bestuur geneem om noodleniging en ondersteuning aan die geaffekteerde gesinne te bied."
Die waarnemende munisipale bestuurder, Noel van Stade, het in reaksie op die ramp die vervoer van meubels, asook noodverblyf vir een van die geaffekteerde gesinne onmiddellik gemagtig.
Daarbenewens het die waarnemende munisipale bestuurder telefonies kontak gemaak met Grain Carriers Transportation Service, die maatskappy wat by die ongeluk betrokke was. "Hoewel die maatskappy nie tot spesifieke aksies verbind is nie, het hulle die munisipaliteit verseker dat hul in kontak sal bly met Oudtshoorn-munisipaliteit."
Verbind tot ondersteuning
Volgens Mle het Oudtshoorn-munisipaliteit hul tot verskeie maatreëls verbind om die geaffekteerde gesinne te ondersteun. Dit sluit in bystand binne die raamwerk van bestaande beleide en wetgewing, die ondersteuning van die gesinne in hul verbintenis met Graan Carriers, en die stigting van 'n komitee gelei deur die bestuurder van Menslike Nedersettings om met die families te skakel en die situasie te monitor.
Boodskap van die burgemeester
"Die munisipaliteit bly toegewyd om die nodige ondersteuning te verskaf gedurende hierdie uitdagende tyd. Die uitvoerende burgemeester, Johan Allers, wil sy dank uitspreek teenoor die rampbestuurspan, amptenare en raadslede wat na die toneel gehaas het om te help, asook die polisie en gemeenskap bedank vir hul vinnige reaksie en bystand.
"Aan die twee families wat deur hierdie tragedie geraak is, wees asseblief verseker van ons volgehoue ondersteuning gedurende hierdie tyd. Ons wens ook ons beste wense vir 'n spoedige herstel aan die vragmotorbestuurder, wat na bewering 'n hartaanval agter die stuur gehad het."
Rampbestuur moes ook die vragmotor se dieseltenk wat lek verseël, en moes saam met Metro Ambulansdienste die bestuurder uit die voertuig verwyder. "
Ten slotte
Mle sluit af deur te noem dat die munisipaliteit se behuisingsafdeling daar werk om verblyf vir die betrokke gesinne te verseker, met raadslid Sonia Bentley wat met tydelike reëlings gehelp het.
Van Stade is in kontak met die vragmotoreienaars om die situasie met die heropbou van die huise, asook alternatiewe verblyf vir die gesinne op te los.
"Die munisipaliteit het bystand verleen tydens hierdie noodgeval en werk nou saam met die maatskappy om te verseker dat die gesinne verdere ondersteuning ontvang."
‘Ons bring jou die nuutste Tuinroete, Hessequa, Karoo nuus’
