OUDTSHOORN NUUS - Van 50 liedjie-aflaaie tot 4,2 miljoen keer op YouTube Music gespeel en 2,5 miljoen kyke op YouTube - 'n plaaslike musikant bewys dat dit nooit 'n opsie is om na die negatiewe stemme te luister nie, selfs wanneer tye moeilik raak.
Abreyam Prins, nou 27 jaar oud en kreatief bekend as Da V.G, is in Oudtshoorn gebore en getoë, woon tans in George en werk by die Youth Café in Groot-Brakrivier. Hy het reeds in gr. 2, op agtjarige ouderdom, begin om liedjies te skryf.
"Ek was nog altyd lief vir stories vertel. My pa het vir my as kind hierdie mal stories vertel wat hy self uitgedink het, en ek was mal daaroor, maar ek kon dit nooit weer so goed vertel soos hy nie," sê Prins.
"Toe ek in gr. 2 was, het ek When I'm Gone van Eminem gehoor en hoe hy stories deur musiek vertel. Dit het my gefassineer. Op daardie ouderdom het ek gedink net mense oorsee - die Michael Jacksons, die Eminems en die mense wat jy op TV sien - kan musiek maak, en dat dit net in Engels gedoen kan word. Toe ek in gr. 6 was, het ek vir die eerste keer 'n Afrikaanse liedjie gehoor. Dit was 'n liedjie van Early B, en toe besef ek dit is iets wat ek ook kan doen."
In gr. 10 het hy en sy vriende liedjies op hul selfone opgeneem - met een foon wat die instrumentele maat gespeel het en die ander een wat die stemme opgeneem het.
Dit was ook daardie jaar dat hy R20 betaal het aan 'n man met 'n ateljee in sy agterplaas om sy eerste liedjie met ateljee-oorfone op te neem.
Hierdie liedjies is daarna op Datafile Music, 'n webwerf wat destyds gewild was onder ondergrondse en opkomende plaaslike kunstenaars in Suid-Afrika, gepubliseer.
Hy sê hy het aanvanklik in Engels geskryf en gesing. Maar in 2018/2019 het hy begin om sy Afrikaanse musiek op te laai, waarna die aflaaie tot ongeveer 1 000 opgeskiet het.
In 2025, het sy jonger suster, Chuemia Prins (bekend as M.I.A.), het hom gedurende die skoolvakansie kom besoek, en hulle het besluit om saam 'n liedjie op te neem: Ek Like Jou. Die liedjie is vervaardig deur die Groot-Brakrivierse kunstenaar Jon William Evertse (Boeta Luv), met vokale produksie deur Rude Boi en Faa Beats.
Vandag is dié liedjie reeds 4,2 miljoen keer op YouTube Music na die liedjie geluister met 2,5 miljoen kyke op die oudiovideo en 1,5 miljoen kyke op die musiekvideo.
Toe hy gevra is watter boodskap hy aan opkomende musikante en ander kreatiewe mense wil oordra, het hy gesê: "My boodskap aan almal wat hul drome probeer verwesenlik, is om nooit op te gee nie. Dit is jóú droom en jóú visie. Ander mense sien dalk nie wat jy sien nie en sal dalk probeer om jou daarvan af te praat, maar moenie moed opgee nie.
"Ek sal eerder misluk met die wete dat ek alles gegee het, as om altyd te wonder wat kon gewees het. Dinge kan baie moeilik raak, maar jy moet aanhou vorentoe beweeg."
‘Ons bring jou die nuutste Tuinroete, Hessequa, Karoo nuus’
