Mensehandel-saak uitgestel tot 2016

OUDTSHOORN NUUS - Die saak in mensehandel teen Jan Jooste, en sy medebeskuldigdes Priscilla Heskwa en Felicity Stoffels, het die week weer in die rondgaande hooggeregshof op Oudtshoorn voortgegaan.

Jooste is verlede jaar by sy huis in Oudtshoorn-Noord op drie klagtes van verkragting van minderjariges en twee klagtes van mensehandel in hegtenis geneem.

Heskwa en Stoffels het na bewering drie meisies van onderskeidelik 10, 11, en 14 jaar vir seks aan hom verkoop.

Al drie het onskuldig gepleit op altesaam 27 klagtes teen hulle.

Die staat het Maandag sy saak gesluit na die ondersoekbeampte in die saak, adjudant-offisier Phillip Jacobs, getuig het.

Jacobs het getuig dat hy die saak reeds in Junie verlede jaar begin ondersoek het nadat hy 'n klag ontvang het van 'n 11-jarige meisie wat die aand nie by die huis geslaap het nie, en haar ma onraad vermoed het.

Volgens sy getuienis het hy met haar gepraat en haar daarna vir 'n mediese ondersoek na die hospitaal geneem. Die dokter het DNS-monsters geneem wat na die laboratorium in Kaapstad gestuur is. Die meisie het hom vertel van die gebeure en dat dit Stoffels was wat haar na Jooste geneem het.

"Na ek al my inligting ingesamel het, is ek na Felicity se huis waar ek aan haar verduidelik het dat ek 'n klag teen haar ondersoek. Ek het haar regte aan haar verduidelik waarna ek haar in hegtenis geneem het. Ek het die verklaring by haar geneem en dit het sy vrywillig gedoen," het Jacobs getuig.

Volgens hom het Stoffels aan hom gesê: "Ek wil vir meneer die volle waarheid vertel."

Volgens haar verklaring het sy Jooste deur 'n vriendin ontmoet, maar het hy homself as Hennie voorgestel en gesê hy is 'n dokter. Jooste het haar gevra of sy al ooit 'n "wit man gevry het", want hy hou van bruin meisies. Daarna het sy vir hulle 'n afspraak gereël en hy het haar opgelaai en na sy huis geneem.

Jooste het glo vir Stoffels gebel en gevra of sy die 11-jarige klaagster ken. Stoffels het die klaagster genader en gevra of die meisie vir Hennie ken waarna die meisie gesê het sy het al met hom gepraat. Stoffels het daarna, op aanvraag van Jooste, 'n afspraak met die meisie gereël.

Hy het die meisie en Stoffels naby die kliniek opgetel en 'n entjie verder weer vir Stoffels afgelaai. Daarna het hy die meisie na sy huis geneem en haar gevra om plat te lê in die kar tot hulle in die erf is. Volgens Jacobs se getuienis moes die meisie ook eers stort voor hy met haar seks gehad het en weer na die tyd stort. Toe hy haar gaan aflaai het Jooste aan haar R100 gegee.

Jacobs het verder getuig dat, tussen die klaag-ster en die beskuldigde, die polisie van nog 'n minderjarige meisie gehoor het en haar ook ondervra het. Daarna het die klaagsters Jooste se huis aan Jacobs uitgewys.

Jooste is daarna in hegtenis geneem. Deur verdere ondersoek en gesprekke het die polisie, Priscilla Heskwa ook in hegtenis geneem. Sy het aan Jacobs gesê sy wou haar kant van die saak stel.

Sy het gesê dat sy Stoffels ken en dat sy ook vir Jooste, as Hennie, deur 'n vriendin leer ken het. Sy het in haar verklaring gesê sy en die vriendin het in Kerkstraat geloop toe hulle deur 'n Jeep met donker ruite agtervolg is. Sy het aan die vriendin gesê dat sy bang raak en die vriendin het vir haar gesê sy moenie bang wees nie, want die man is 'n "catch".

Jooste het by hulle gestop en gesê hulle moet inklim hy sal hulle 'n geleentheid tot by die begraafplaas gee. Sy het saam met haar vriendin agter in die voertuig geklim. Daarna het hy verby die begraafplaas Dysselsdorp toe gery.

Volgens Jacobs het Jooste op 'n stadium stilgehou en vir Heskwa gevra om voor langs hom te sit waarna hulle tot by 'n naby geleë dam gery en stilgehou het.

Daar het hy glo om die beurt met die twee vrouens seks gehad. Jooste is daarna Kaap toe en met sy terugkeer het hy en Heskwa 'n verhouding gehad. Sy het dit stopgesit omdat Jooste wou hê sy moes vir hom kinders bring om mee seks te hê. Sy het ook geld by Jooste gekry.

Toe Jooste uitvind daar is 'n ondersoek en sy naam word genoem het hy haar gekontak en gesê sy moet vir hom getuig en hy sal haar elke maand onderhou. Sy het egter geweier.

Gedurende kruisondervraging het Gideon Badenhorst, Jooste se prokureur dit aan Jacobs gestel dat die verklarings nooit aan die klaag-sters of aan die twee vroulike beskuldigdes teruggelees is nie en dat hy sekere goed in die verklarings verkeerd geskryf het. Jacobs het dit egter ten sterkste ontken.

Dit het ook geblyk dat geen klaagster vrywillig na Jacobs gegaan het nie en dat Jacobs die drie klaagsters self genader het.

Vaughn Shone, Stoffels en Heskwa se prokureur, het gesê dat hulle sekere dele van die inhoud van die verklarings betwis omdat sy kliënte sê hulle het dit nooit aan Jacobs gesê nie. Ook hy het gesê die klaagsters het getuig dat Jacobs te vinnig geskryf het en nie die verklarings teruggelees het nie.

Daar was ook 'n geskil omdat die een klaagster glo Xhosa-sprekend is en Jacobs nie 'n tolk gehad het nie. Jacobs het egter gesê die meisie het vlot Afrikaans gepraat en hy het nie eers agtergekom sy is Xhosa-sprekend nie.

Die saak dien voor 'n besoekende regter, Sakkie van Staden en 'n assessor, adv. Stoffel Prinsloo. Advv. Mornay Julius en Michelle Weyers tree vir die staat op.

Van Staden het die saak tot 26 Januarie 2016 uitgestel sodat die verdediging met hulle getuies kan begin. Shone het intussen bevestig dat hy en Badenhorst gaan aansoek doen tot ontslag. Volgens Shone is daar op die stadium nie genoegsame bewyse om hul kliënte skuldig te bevind nie en kan hulle daarom aansoek doen tot ontslag.

Klik hier vir vorige artikels: