OUDTSHOORN NUUS - Die goedkeuring van die aansoek van die nasionale departement van klein-ondernemingsontwikkeling vir die oprigting van 'n lughawe-logistieke sentrum by die Oudtshoorn-lughawe, is slegs die begin van 'n langtermynprojek, sê Oudtshoorn- burgemeester, Johan Allers.  

Allers het verlede week op sy amptelike Facebook-blad die raadsbesluit van 30 Oktober om die aansoek goed te keur, gedeel. In 'n gesprek met Oudtshoorn Courant hierdie week, het hy gesê mense moet besef dat hierdie slegs die goedkeuring van die aansoek was en dat daar nog 'n hele pad, wat in verskeie fases opgedeel is, voorlê. 

Die eerste fase wat op ontwikkeling van infrastruktuur sal fokus, word beplan vir Junie 2026.  

"Die tweede ding wat ek wil beklemtoon, is dat dit geen invloed het of verandering behels van die huidige bestuur van die lughawe of huurders nie. TFASA bestuur die lughawe, die Aeroklub is nog daar sowel as die lugambulansdiens - dit verander nie."  

Hy het gesê dat so 'n ontwikkeling 'n belegging in Oudtshoorn se ekonomie en toekoms is wat nie deur die vingers moet glip nie. Hy voeg ook by dat die beplande ontwikkeling 'n groot ekonomiese voordeel vir Oudtshoorn inhou, maar dat dit volgens streng voorskrifte en met beplanning van kundiges aangepak sal word.

Ideaal vir ontwikkeling
Oudtshoorn se lughawe is ideaal geleë om ontwikkel te word. Gedeeltes van die burgemeester se inskrywing op sosiale media lui: "Die beplande opleidings- en logistieke sentrum, wat bekend sal staan as die Klein Karoo Airport Hub, is 'n kommersiële eiendomsontwikkeling wat logistiek, lugvaartondersteuningsdienste, kantoorruimte en pakhuise sal insluit. 

Die sentrum se missie is om 'n strategiese, toonaangewende logistieke spilpunt te skep wat lugvaartverwante aktiwiteite en ondernemings ondersteun, met die doel om op Oudtshoorn die mees doeltreffende en innoverende lughawegekoppelde sentrum in die streek te vestig."  

In die aansoek wat voor die raad gedien het, word onder andere gesê: "Die idee agter die projek is om deur toekomstige opgraderings aan paaie, verbeterde dienste en infrastruktuur 'n terrein te skep wat transformeer in 'n florerende ekonomiese sentrum wat plaaslike groei en ontwikkeling aanwakker, Die projek sal as 'n groot werkverskaffer dien."  

Befondsing vir die projek sal afkomstig wees van die departement van klein-ondernemingsontwikkeling (BISP), munisipale befondsing en bydraes in die vorm van dienste en hulpbronne asook MIG-befondsing van die regering.

‘Ons bring jou die nuutste Tuinroete, Hessequa, Karoo nuus’