OUDTSHOORN NUUS - Dokters doen alles in hulle vermoë om die vergruisde linkerknie van Carol Ann van Rensburg (19) te red nadat sy Dinsdag 31 Januarie in 'n ernstige botsing in Rademeyerstraat betrokke was. Sy is steeds in Mediclinic George se hoësorgeenheid.
'n Ooggetuie het Dinsdag op die toneel aan die Oudtshoorn Courant gesê dat Carol Ann uit Rademeyerstraat met 'n Big Boy-motorfiets gery het. Die botsing het gebeur toe sy regs in Ooste-likeweg gedraai het en 'n vragmotor, wat van voor gekom het, haar getref het. Daar was 'n stopteken aan die vragmotor se kant terwyl die motorfietsryer ryvoorrang gehad het.
Met die aankoms van die Oudtshoorn Courant op die toneel was die motorfiets onder die vragmotor vasgepen en was paramedici reeds besig om die vrou te behandel.
As gevolg van haar ernstige beserings is die AMS-helikopter ontbied en is sy na George gevlieg.
Sers. Gretchen Micheals, woordvoerder van die Oudtshoorn-polisie, het gesê 'n klag van roekelose en nalatige bestuur word ondersoek. Sy het ook bevestig dat dit 'n vragmotor van 'n bestuurskool was wat in die ongeluk betrokke was.
Die bestuurder van die vragmotor is op die toneel deur die polisie in 'n vangwa gelaai, maar volgens Micheals was dit vir sy eie veiligheid aangesien van die omstanders opstandig ge-raak het. Die polisie het ook bevestig dat dit nie 'n leerlingbestuurder was wat die vragmotor bestuur het nie en is hy waarskynlik 'n instrukteur.
Verskeie besigheidseienaars in Rademeyerstraat het op die toneel gesê dat die drierigtingstop op die kruising van Rademeyerstraat en Oostelikeweg 'n groot kopseer is omdat voertuigbestuurders die stopteken gereeld verontagsaam.
Volgens Carol Ann se ma, Ansie van Rensburg, sou Carol Ann gisteroggend (Donderdag) 'n verdere operasie ondergaan.
"Die vragmotor het haar linkerknie vergruis en daar is 'n gat in haar regterkuit. Haar linker-voet is op dié stadium nog erg geswel, so die dokter wag tot die swelling minder is voor hy weer gaan kyk wat met die voet fout is. Sy het ook 'n rib gebreek en 'n stamp teen haar kop gekry, maar gelukkig het sy geen breinskade opgedoen nie," vertel Van Rensburg.
Volgens haar is Carol Ann aanvanklik ook onder verdowing geplaas en aan 'n ventilator gekoppel om haar te help met asemhaling. Sy was egter teen Woensdag van die ventilator af en by haar volle bewussyn.
"Die dokter het Dinsdag vir drie ure geopereer en die knie opgebou en skroewe en plate ingesit. Ons hoop nou net dat die bene sal heg en die gat in haar kuit sal herstel. Die dokter het vir my gesê soos die beserings vir hom lyk moes die vragmotor definitief oor haar bene gery het en was die ergste impak op haar knie."
Carol Ann is 'n student by die North Cape Computer College.
Klik hier vir vorige artikels:
- Student vergruis knie na motorfietsongeluk
- Opvolg: Motorfiets beland onder vragmotor
- Motorfietsryer beland onder vragmotor
ARTIKEL & FOTO: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
