Kleyn eers in Augustusin getuiebank

OUDSTHOORN NUUS - Die verhoor van Rassie Kleyn, wat tereg staan op 71 klagtes van bedrog, alternatiewelik diefstal waarby miljoene rande betrokke is, is verlede Donderdag hier in die streekhof tot Augustus uitgestel nadat die beskuldigde weer nie sy plek in die getuiebank ingeneem het nie.

Kleyn sou die vorige dag begin getuig het, maar het toe met 'n aantal nuwe verwere vorendag gekom ten opsigte van twee boekhouers, Chris Bredekamp en Michelle Kapp, wat reeds getuig het.

Die twee se antwoorde van onderskeidelik sewe en veertien bladsye is Donderdag as be-wysstukke ingedien waarop die hof aangedui het dat tyd nodig is om dit te bestudeer.

Streeklanddros Mark Van Wyngaardt het hierna gesê hy vertrou dat die verdediging in Augustus alle dokumentasie ingehandig sal hê.

"Die verdediging sal nou moet ophou om verdere getuienis te kry. Ek is nie 'n kommissie van ondersoek nie en dit lyk nou amper so," het die landdros gesê.

Die staatsaanklaer, adv. Louis van Niekerk van die kantoor van die Direktoraat van Openbare Vervolging, het die hof meegedeel dat die dokumente drasties verkort kan word en dat die staat van voornemens is om sy saak met voortsetting van die verhoor te sluit Kleyn was die eienaar van Oudtshoorn Rekenkundige & Finansiële Dienste BK, en word daarvan aangekla dat hy Camelus Voere (BK) wat in 2008 gelikwideer is, bedrieg het. Hy pleit onskuldig en het by monde van sy regsverteenwoordiger, Wenzel Botha van die regshulpraad, gesê dat hy "oor elke sent" antwoord sal kan gee.

Die eienaar, dr. Stefanus Cilliers, was tot verlede Dinsdag onder kruisverhoor.

Hy het talle vrae wat Botha aan hom gestel het na Bredekamp en Kapp verwys en was duidelik gefrustreerd oor vrae wat, volgens hom, "niks te make het met die klagstaat nie."

Kleyn word daarvan aangekla dat hy Artikel 64 (2) van die Wet op Beslote Korporasies, Wet 69 van 1984, oortree het.

Hy was sedert 1999 die rekenkundige beampte vir Camelus Voere wat vir die finansiële jare 2000 tot 2008 rekenkundige dienste asook finansiële bestuursfunksies aan Camelus Voere gelewer het. Salarisse van Camelus Voere se personeel is vanuit die EP Kleyn praktykreke-ning, synde Kleyn se persoonlike bankrekening, betaal.

Volgens die klagstaat het Kleyn oorbetalings ter waarde van altesame R8 268 496.90 vanaf Camelus Voere se bankrekening na die EP Kleyn-bankrekening gedoen. Camelus Voere is in 2008 gelikwideer.

Van Wyngaard, wat bygestaan word deur 'n assessor, Geoff Stenekamp, 'n afgetrede rekenmeester, het die saak vir voortsetting tot 17 Augustus uitgestel.

Klik hier onder vir vorige artikels:

Bedrogsaak weereens uitgestel