OUDTSHOORN NUUS - Om met 'n twee-weke oue baba teen 'n ysige pas wat gesluit is op te foeter gaan mens se verstand te bowe. Dit was die reaksie van een van Oudtshoorn se reddingswerkers wat weereens gevra het dat mense moet wegbly van die Swartbergpas.
Nadat vyf voertuie gister op die Swartbergpas vasgekeer was, het daar ongelooflik soos dit mag klink, vandag weer onbesonne bestuurders hulle gesinne se lewens in gevaar gestel en by die Swartbergpas wat vir verkeer gesluit is, opgery.
'n Kenner van die Swartbergpas en bekende toergids, Roeland Gabriel het vandag 'n insleepdiens bygestaan om agt voertuie uit die pas te sleep. Verskeie mense moes eers na veiligheid gebring word voordat hulle voertuie verwyder kon word.
Volgens inligting wat die Oudtshoorn Courant bekom het, is daar steeds voertuie gestrand. Dié voertuie kan eers môre middag as ys op die pad gesmelt het, verwyder word. Oudtshoorn se hoof van rampbestuur, Adele Supra-Vertue het vandag gewaarsku dat die pas lewensgevaarlik is.
Motoriste word weereens gewaarsku om onder geen omstandighede die pas vanaf Oudtshoorn of Prins Albert te probeer gebruik nie.
'Ons bring jou die nuutste Oudtshoorn, Klein Karoo nuus'
