OUDTSHOORN NUUS - Die aansoek van twee senior weermagoffisiere om in 'n militêre hof en nie 'n sivielehof verhoor te word nie, is Donderdag hier in die streekhof van die hand gewys.
Streeklanddros Mark van Wyngraadt het in sy uitspraak gesê hy stem nie saam met die redes wat die twee beskuldigdes, genl. Xolani Mankayi, voormalige bevelvoerder van die Oudtshoorn Infanterieskool, en kol. Nkhabu Nthejane, die huidige bevelvoerder, se regsverteenwoordiger, adv. Joey Moses, voor die hof gebring het nie.
Mankayi en Nthejane staan tereg op aanklag van intimidasie en dat hulle die polisie in die uitvoering van hul pligte gekniehalter het.
Volgens die landdros beskik die sivielehof wel oor die jurisdiksie om die saak aan te hoor aangesien dit nie gaan oor 'n oortreding wat in die militêre basis plaasgevind het nie.
Moses het in sy aansoek aangevoer dat die twee offisiere die betrokke aand van die voorval in die hoedanigheid as bevelvoerders opgetree het en dat 'n sivielehof nie oor die jurisdiksie beskik om hulle te verhoor nie.
Die staatsaanklaer, adv. Michelle Weyers, het die aansoek teengestaan omdat dit 'n presedent sal skep. Volgens haar is soldate al dikwels in die verlede in suksesvol in sivielehowe verhoor.
"Dit sal chaos veroorsaak indien soldate buite hul basisse misdade pleeg en nie in 'n sivielehof verhoor kan word nie," het sy ten tyde van die aansoek betoog.
Die saak is vir verhoor tot 1 September uitgestel.
Klik hier vir vorige artikels:
- Weermagoffisiere word van hand gewys
- Weermag hoës wil militêre hof toe
- Senior offisiere se saak uitgestel
- Offisiere se saak tot 2016 uitgestel
- Twee in hof vir intimidasie
ARTIKEL: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
