OUDTSHOORN NUUS - Die voormalige bevelvoerder van die Oudtshoorn Infanterieskool, brig.genl. Xolani Mankayi, en die huidige bevelvoerder, kol Nkhabu Nthejane wat na bewering op 'n aand in Mei verlede jaar soldate in pantservoertuie na die Oudtshoorn-polisiestasie laat opruk en gedreig het om die stasie op te blaas, het Maandag weer vlugtig in die Oudtshoorn-streekhof verskyn.
Die saak is op versoek van die staat deur streeklanddros Mark van Wyngaardt voorlopig tot 11 Desember uitgestel om die staat die geleentheid te gee om 'n aansoek oor jurisdiksie wat die verdediging gebring het ten opsigte van Art 106 van die Strafproseswet te bestudeer en daarop te reageer.
Volgens die staatsaanklaer, adv. Michelle Weyers, moet so 'n aansoek binne 'n "redelike tyd" voor 'n hofdatum aan die staat voorsien te word.
Die aansoek is egter eers Maandagoggend ingedien.
Mankayi en Nthejane word daarvan aangekla dat hulle op 17 Mei verlede jaar sowat 100 soldate gemobiliseer, bewapen en in pantservoertuie na die polisiestasie op Oudtshoorn laat kom het om 'n aantal van hul makkers te "ontset" wat vroeër die dag tydens 'n polisieklopjag by 'n kuierplek in Bongolethu in hegtenis geneem is.
Die twee beskuldigdes het na bewering ook rassistiese aanmerkings teenoor polisiebamptes aan diens toegesnou en die polisie het die hekke van die perseel toegesluit voordat die aangehoudenes vrygelaat is sonder om enige boetes te betaal.
Die twee beskuldigdes se regsverteenwoordiger, Lloyd Fortuin van Faure en Faure in die Paarl, het vroeër aangedui dat hulle onskuldig sal pleit op al die klagtes teen hulle.
Mankayi is na sy tydperk as bevelvoerder van die Infanterieskool op Oudtshoorn aangestel as hoof van staf in die Infanterieformasie en later as bevelvoerende generaal van een van die SANW se voorste gevegseenhede, 43SA Brigade.
Klik hier vir vorige artikels:
- 16 Instructors in military court
- Military officers failed to appear in court
- Saak teen weermag-offisiere uitgestel
- Twee in hof vir intimidasie
ANC-ondersteuners en voormalige MK lede voor die Oudtshoorn-landdroshof tydens 'n vorige verskyning van die twee senior weermagoffisiere. Foto: Garnett Wicomb.
ARTIKEL EN FOTO: GARNETT WICOMB, OUDSTHOORN COURANT - KORRESPONDENT
'Ons bring jou die nuutste Oudtshoorn, Klein-Karoo nuus'
