OUDTSHOORN NUUS - In 1962 het staatspresident CR Swart die opening van die burgersentrum behartig.
Pat Wagenaar, toe `n leerder aan Hoërskool Môrester, was een van `n groepie leerders wat daardie byeenkoms sou boikot.
"Die vorige aand het ons `n kennisgewing by die skool opgeplak om ons daarvan te distansieer," het Wagenaar Dinsdagoggend in die raadsaal vertel.
Hy is tydens die oggend se raadsvergadering amptelik as raadslid ingesweer.
Wagenaar het die geleentheid as, "`n besonderse mylpaal" beskryf. "Dit is `n bewys van die pad wat die lewe soms met `n mens kan stap," het Wagenaar verduidelik en bygevoeg dat hy daarna uitsien om weer in diens van die gemeenskap te wees.
Hy is deur alle partye tot die raad verwelkom. Die speaker, John Stoffels, wat Wagenaar namens die NPP geluk gewens het, het gesê dat hy beïndruk is daarmee dat Wagenaar hom tot diens van die hele Oudtshoorn beskikbaarstel.
Wagenaar het toeganklikheid en deursigtigheid by sy mede-raadslede bepleit.
"Kom ons dien mense met die waarheid, respek en eerlikheid. Kom ons wees verantwoordbaar."
Klik hier onder vir verwante artikels:
- Nuwe raadslid wil gemeenskap dien
- My beker loop oor
- Onthou Wyk 7 se tussenverkiesing môre
- Wyk 7 kanidate reg vir 6 Mei
ARTIKEL EN FOTO: JACQUES SWART, OUDTSHOORN COURANT JOERNALIS.
'Ons bring jou die nuutste Oudtshoorn, Klein-Karoo nuus'
