OUDTSHOORN NUUS - Daar word voorspel dat vandag die warmste dag in Oudtshoorn sover hierdie somer gaan wees.
Temperature van soveel as 44 grade word voorspel. Inwoners word gewaarsku om uiters versigtig te wees en voorsorg teen hitte-uitputting en dehidrasie te neem.
Dorsheid, hoofpyn, duiseligheid en naarheid kan die eerste tekens van dehidrasie wees en daar moet veral met kinders en bejaardes voorsorg getref word.
Die volgende riglyne en voorsorgmaatreëls is belangrik tydens hittegolwe soos vandag verwag word:
• Beperk sport- en ander fisiese aktiwiteite
• Dra ‘n hoed om die son af te weer
• Wend ‘n goeie sonskerm aan en wees bewus dat selfs die beste sonskerm nie voldoende beskerming teen die son bied nie
• Neem genoeg water in en verseker dat babas voldoende vloeistof kry
• Maak seker dat troeteldiere in skaduwee kan lê en verseker dat hulle genoeg water het
• Moet onder geen omstandighede kinders, babas, bejaardes of troeteldiere in geparkeerde motors laat nie
• Kry onmiddelik mediese hulp indien ‘n kind of bejaarde enige teken van dehidrasie toon
• Op warm dae is daar ‘n groot brandgevaar en mense word gewaarsku om nie oop vure te maak en sigaretstompies langs paaie uit te skiet nie.
'Ons bring jou die nuutste Oudtshoorn, Klein Karoo nuus'
