OUDTSHOORN NUUS - Vier mans is verlede maand in hegtenis geneem na daar oor 'n tydperk van twee maande 'n groot hoeveelheid volstruiseiers van die plaas Paardebond gesteel is.
Volgens die boer, wat verkies om anoniem te bly, word daar op 'n daaglikse basis eiers uitgehaal en die nesse word genommer. Daar word ook baie streng rekord gehou van hoeveel eiers waar uitgehaal word en op die manier kon hulle vasstel dat eiers gesteel word.
"Nadat ons vasgestel het uit watter dele van die broeivelde die eiers gesteel word het ons begin om die velde met kameras te mo-nitor. Een van die werkers het ons kom vertel dat daar 'n volstruiswyfie geslag is. Ons het dadelik die kameras nagegaan en die polisie van die voorval in kennis gestel," vertel hy.
Volgens kapt. Louis Visser is daar vier persone dadelik op die foto's geïdentifiseer en daar is ses leë volstruisdoppe by die verdagtes se huis, wat van Dysselsdorp afkomstig is, gevind.
Die boer sê dit is moeilik om die skade te bepaal.
"Ons vermoed daar is ongeveer 45 eiers gesteel. Die beraamde skade, as 'n dag oud kuiken teen R300 verkoop word beloop die skade ongeveer R13 500. Daar is ook twee wyfies geslag en die beraamde waarde is ongeveer
R6 000 tot R12 000."
ARTIKEL: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshoorn, Klein-Karoo nuus'
