Vermeende huurmoordenaar getuig weer

OUDTSHOORN NUUS - Die verhoor van die Chinees wat van sameswering om te moor aangekla word is Vrydag in die Oudtshoorn-streekhof tot 5 Mei uitgestel met een van die vermeende huurmoordenaars wat steeds onder kruisverhoor is.

Die 35-jarige Eugene Viljoen van Pacalts-dorp, het Vrydag die wenkbroue laat lig toe hy getuig het dat die beskuldigde, Gaushun Gao, hom die aand van 22 September 2014 ook gevra het of hy nie weet waar hy 'n vuurwapen en 'n handgranaat in die hande kan kry nie.

Viljoen se getuienis het verskil van twee verklarings wat hy na die betrokke aand afgelê het en is daaroor deur Gao se regsverteenwoordiger, Daan Dercksen, gekonfronteer.

Op 'n vraag van Dercksen waarom hy nie die ondersoekbeampte, AO Wessels Bouwer, vertel het van 'n vuurwapen en 'n handgranaat nie, het Viljoen geantwoord dat hy, "haastig was om by die huis te kom".

Hy het erken dat die ondersoekbeampte sy verklarings aan hom voorgelees het en hy gesweer het dat dit die korrek is.

Gau het Viljoen glo R10 000 aangebied om die eienaar van die Bagley's Nagklub in St Johnstraat, Julia Bagley, te vermoor.

Hy en 'n vriend, Lee-Curt Potts is deur Gao na Oudtshoorn gebring om die moord te pleeg en is by 'n vulstasie afgelaai toe hulle geweier het om dit te doen.

Die saak dien voor streeklanddros Mark van Wyngaardt en adv. Michelle Weyers is die aanklaer.

Klik hier vir vorige artikels: