OUDTSHOORN NUUS - Hy glo die besluit om die 35 soldate wat by 'n kuierplek in Bongolethu in hegtenis geneem is, vry te laat, het verhoed dat twee pelotons in gepantserde voertuie na die polisiestasie opruk om dit op te blaas.
So het kol. Ollie Olivier van die Suid-Afrikaanse Polisiediens, verlede Donderdag in die verhoor van twee senior weermagoffisiere in die Oudtshoorn-streekhof getuig.
Olivier het getuig dat hy en kapt. Frank van Rooyen, bevelvoerder van die openbare orde-polisiëringseenheid (Pops) die besluit in belang van die breë gemeenskap van Oudts-hoorn geneem het.
Hy het getuig in die verhoor van kol. Nkhabu Nthejane, bevelvoerder van die Oudtshoorn Infanterieskool en kol. Xolani Mankayi, 'n voormalige bevelvoerder, wat teregstaan op aanklag van intimidasie en dat hulle die polisie in die uitvoering van hul pligte verhinder het.
Albei pleit onskuldig. "Ons het almal geïntimideerd gevoel oor die twee beskuldigdes se optrede," het Olivier getuig.
Volgens hom het hy en Van Rooyen met Nthejane ooreengekom om die soldate voorlopig vry te laat.
"Ek glo dat die besluit voorkom het dat soldate met gepantserde voertuie opruk na die polisiestasie."
Nthejane het volgens Olivier egter met die aankoms van Mankayi heeltemal van houding verander en in opdrag van Mankayi die Infanterieskool gebel om twee pelotons soldate in gepantserde voertuie na die polisiestasie te stuur "om die plek te vernietig".
Olivier het erken dat Mankayi met senior polisie-offisiere oor die aangeleentheid wou praat.
Volgens die twee beskuldigdes se regsverteenwoordiger, adv. Mervyn Doralingo, was die meer as 40 polisielede nooit gedreig nie, en is daar ook nie soldate in pantservoertuie ontbied nie.
Hy wou weet waarom die beskuldigdes dit sou wou doen aangesien daar reeds ooreengekom is dat die soldate vrygelaat sal word.
"Beskuldigde 2 (Nthejane) sal kom getuig dat hy na die ooreenkoms oor die vrylating die Infanterieskool geskakel het om reëlings te tref vir die beveiliging van die basis."
"Die oproep het niks te doen gehad met die lede wat gearresteer is nie."
Op 'n vraag aan Olivier of hy pelotons en gepantserde voertuie buite die polisiestasie gesien het, het Olivier getuig dat hy nie deur mure kan sien nie.
Olivier het ook getuig dat indien 'n dreigement nie gemaak is om pelotons en gepantserde voertuie na die polisiestasie te ontbied nie, "niemand vandag hier in die hof sou gestaan het nie".
Streeklanddros Mark van Wyngaardt het die saak verlede Vrydagoggend vir verdere verhoor oor vyf dae, van 19 tot 23 Junie 2017, uitgestel.
Adv. Michelle Weyers is die aanklaer in die saak.
Klik hier vir vorige artikels:
- Opvolg: Offisiere pleit onskuldig
- Weermagoffisiere word van hand gewys
- Weermag hoës wil militêre hof toe
- Senior offisiere se saak uitgestel
- Offisiere se saak tot 2016 uitgestel
- Twee in hof vir intimidasie
ARTIKEL: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
